熟成牛肉飯店點120g「大盛」　網民即場上磅轟呃秤　店方辯「生肉原重」掀激烈討論

【有線新聞】不少燒肉店、牛肉飯店會標示肉量有多重，但有時感覺上菜份量不足秤，往往都只能「口同鼻拗」。有網民日前在一間標榜「慢煮熟成牛肉飯專門店」食飯，點了一份120克「大盛」後，上枱用磅秤後發覺份量竟然不足一半，店家解釋重量是以牛肉熟成前計算，隨即惹來大批網民留言負評。

點特盛牛肉飯唔夠秤　餐廳：熟成後嚿肉輕咗

涉事牛肉飯店有兩間分店，位於尖沙咀及銅鑼灣。據餐牌標示，套餐最平88元起就可以有90克肉、日本飯及醬汁，份量就有最基本90克的「並盛」；加28元、120克的「大盛」；加48元、150克的「特盛」。事主點一份120克「大盛」後，他說上菜時已看得出份量不夠，「上磅仲離譜得50克肉，你哋同事話睇錯加返畀我，都係得100克」，又稱女友亦點了一份90克牛肉餐，磅完都只有50克肉。事主批評店家「定其實標準係50克？你哋廚房連個磅都無，點統一出餐重量？可能係我唔好彩，如果我無帶磅出街，我連加返少少肉嘅機會都無。」

餐廳在帖文留言回應指，餐牌上所有重量以生肉時計算，「90克意思係每份以90克牛肉熟成，肉纖維經過多日熟成後會有改變，水份同重量會令肉輕咗。」又指理解寫上90克／120克會令客人認知是出品時有90克重量，會盡快在標明清楚重量說明。

但有關回應如火上加油，反激起網民留言批評，部分人指店家死撐，「你逐塊切左出嚟先熟成？根本存心呃消費者，不如一齊帶磅去試試佢」、「我去食飯梗係睇枱上面舊牛㗎啦，你不如話隻牛在生連骨計係有120g」、「好在你唔係賣蛋糕，如果唔係你攞兩磅麵粉去計，都唔知幾多人過嚟食先食得哂」。

餐廳再道歉願賠償　事主拒收兼報海關

店家之後再在社交平台致歉，指誤導之嫌係大錯特錯、責無旁貸，「我哋還在起步階段，深知有很多不足，希望大家再次俾機會我哋」亦承諾會加大力度培訓、審視並改善所有餐牌字眼、確保每件產品質素及份量，亦願意向事主退還該日餐費作補償。

事主則拒絕接受退還餐費，「如果要賠不如賠返你哋之前呃過嘅食客，唔使賠俾我啦，希望我係最後一個」，又解釋帶磅出街是要紀錄每一餐的營養素，原意並非打算針對餐廳，並已就事件向海關舉報。

網民同呻不快體驗：啲飯又硬、員工無禮貌

有人則同情餐廳，批評事主吹毛求疵「攞埋個磅去食」，「而家做生意好難，店家成日要跪低。你哋再係咁落去以後食穀種啦！自己返屋企煮啦！」部分人批評餐廳仍然不知錯「係咁講大話賴餐牌、賴新開，其實已經開咗年幾，即係呃足咁耐」、「有一部份香港人仲會留港消費，甚至唔介意出貴啲錢食好啲，你仲要過大家一棟，有冇感到羞愧」。

亦有網民分享不快用餐體驗，「兜飯禿過茶餐廳啲碟頭飯，唔知呢度有冇50克？汁都冇多滴」、「早一個月食加飯錢轉咗醬油炒飯，啲飯切又切唔開、咬又咬唔爛，見隔離幾枱都係咁」、「啲飯凍到隔夜飯喺雪櫃拎出嚟咁、啲員工又冇禮貌」、「啲牛又薄又柴、個飯又硬，成兜野得個照燒汁味，食完仲要唔飽。」