德甲｜利華古遜3比1反勝萊比錫　弗賴堡4比3禾夫斯堡

【有線新聞】德甲，利華古遜作客3比1反勝萊比錫。

藍衫利華古遜走漏了舒拿加，被他禁區頂連過兩關再起腳，35分鐘落後。利華古遜用了5分鐘追平，泰利亞接應傳中一頂，連續兩場有進帳。萊比錫今季主場未輸過，紀錄到此為止，舒克44分鐘攻入反先一球，避開守衛飛鏟再射掛網，對方想護空門都無能為力。18歲小將高比夫77分鐘入替，補時7分鐘建功，德甲地標戰就有入球。利華古遜贏3比1，以較佳得失球壓過同分的萊比錫，升上第3。

同樣作客贏波，紅白衫弗賴堡鬥禾夫斯堡驚險得多，憑菲臘堤奧的入球5分鐘領先，禾夫斯堡靠比仙奴域收復失地，13分鐘窄位射入，1比1。弗賴堡門將艾度保路換邊後犯錯，連累球隊領先變落後，後場交失，比仙奴域多謝了，禾夫斯堡49分鐘反超前。薛特禁區踩跌靴拿，主隊輸12碼，基列科操刀射入，56分鐘2比2。

弗賴堡後防錯誤示範，只顧舉手投訴對手越位，球證無吹哨，比賽都是繼續，比仙奴域輕鬆射入，69分鐘大演「帽子戲法」。弗賴堡靠手榴彈戰術，71分鐘再次扳平。堅達頭槌被擋，反彈薛特「擺烏龍」。舒靴赫7分鐘後勁射，為弗賴堡鎖定贏4比3，繼續排第9，禾夫斯堡跌至14。