沙特聯｜C朗復出即入兩球　艾納斯5比2艾拿積馬

【有線新聞】沙特職業足球聯賽，C朗拿度一復出就攻入兩球，艾納斯主場5比2擊敗艾拿積馬。

榜首鬥榜尾，黃衫艾納斯早段連番攻門都無收穫，44分鐘走甩了後上的艾杜拉希，要先失守。他們完半場前連入兩球反先，艾咸丹門前快腳射入，上半場補時8分鐘追平。文尼1分鐘後個人表演，左路壓入禁區射成2比1。換邊後被艾拿積馬打穿防線，卡度素47分鐘追成平手，艾納斯無再失威，C朗的罰球博到對方手球，12碼親自操刀，門將捉到路都入，56分鐘3比2。

養傷超過一個月，這位41歲葡萄牙球星一復出就入兩球，入球後未見慶祝，皆因被指越位，當然不滿。VAR還他清白，球證改判入球有效，艾納斯73分鐘進一步拉開，亦是C朗生涯第967球，前場拍擋文尼都有兩球進帳，補時5分鐘「埋齋」。艾納斯贏5比2，聯賽12連勝，踢多一場下榜首領先第2的希拉爾6分。