羅馬網球精英賽　施維杜蓮娜力克施維雅晉級決賽

【有線新聞】羅馬網球精英賽，施維杜蓮娜擊敗施維雅迪躋身女單決賽，會跟歌芙爭冠軍。

兩位冠軍級人馬過去10屆賽事，黑衫的施維杜蓮娜跟施維雅迪贏了5次冠軍，反手來回多板，施維杜蓮娜落網，首盤失2個發球局下3次破發，對手急於進攻，全場50次大意失誤，施維杜蓮娜先贏6比2。這位烏克蘭球手第二盤一來就連失3局，被施維雅迪斜線考起，接發球回落網，輸4比6被追平。

3月印第安韋爾斯賽之後，再次鬥到第三盤，施維杜蓮娜最後都贏，第一下發力打不穿，剛柔並濟，上網收力削過去，全場面臨16個破發分。施維杜蓮娜化解11次，第三盤佔5次，再贏6比2，盤數2比1晉級，繼2018年再入決賽。

上屆亞軍、白衫歌芙重返決賽，直落兩盤擊敗姬絲迪亞，底線兩邊飛撲，救完就打反擊，球貼著網。歌芙首盤先失發球局，落後2比4下扭轉形勢，連取4局，反勝6比4。22歲對36歲，歌芙好氣好力，今年第3次交手，贏第3次，第二盤鬥到2比2，之後5局贏4局，贏多盤6比3，第16次打入巡迴賽決賽。