小紅書分享裝修案例　元朗居屋廚櫃變「外傭房」　網民轟業主冇人性：不如唔好請

【有線新聞】近日網上流傳一段短片，顯示有僱主將單位廚房的廚櫃改裝成外傭寢室，環境狹窄且衛生堪憂，隨即引發網民熱議。不少人炮轟僱主行為刻薄，侮辱工人尊嚴，狠批「將心比己，佢自己都唔會想瞓喺廚櫃啦」。

有網民在社交平台轉載小紅書片段，顯示為元朗朗天苑一單位的裝修設計案例，稱「元朗朗天苑業主收場，業主大大讚揚」。轉載的網民直言「如果我係工人，見到份工要我瞓油淋淋嘅廚櫃，我會hea做借錢偷嘢搏炒算」。從片段可見，該空間極為狹窄，且位於廚房重地，衛生情況令人擔憂。

帖文隨即引來大批網民留言，有人嘲諷指「餐餐預咗俾人加料」。亦有網民分析，這可能是僱主的「心理戰」，迫使外傭為了不與曱甴同眠，必然每日確保廚房乾淨。不過，更多網民直斥僱主「冇人性」，「咁嘅條件唔好請工人啦好心……」、「將心比己，佢自己都唔會想瞓喺廚櫃啦」、「如果有black list僱主制度就好」。

另有網民質疑，涉事「睡房」位於單位玄關位置，「目測仲要無冷氣」，批評設計「絕到冇朋友」，擔心外傭隨時有窒息風險，「一熄冷氣，個姐姐就焗死咗」、「日夜吸油煙，身體好難冇事」。有網民則分享身邊案例，指曾有友人將入牆大衣櫃改裝成外傭房，結果被其他朋友「插到佢開花」，強調「唔使當姐姐係上賓，但基本尊重要有」，亦有網民提醒工人姐姐「見到呢個地址唔好接」。