城市花園老翁吐痰「儲足半杯」　目擊者反胃走人、促店方棄置　「阿姐話會，希望係真」

【有線新聞】疫情「教訓」過後公眾都更注重衛生，但仍然不時有人「闊佬懶理」，繼續胡亂𦧲痰。有網民就目擊有老翁在快餐內吐痰落杯，相當令人反胃，當場「食唔落走人」。

直言影響食慾　「半個杯都係嗰啲痰」

事主在社交平台以「恐怖食客」為題發文，直言「凖備食嘢千祈唔好睇圖」，指自己第一次在餐廳被他人影響食慾，「直頭真‧反胃」。事主指事發於9月17日在北角城市花園大家樂，「坐低冇耐，正對面個阿伯吐痰落個杯到（度），望真啲先驚見佢半個杯都係嗰啲痰。」

「頂唔順唯有轉位，但現場唔多吉枱所以其實只係轉咗喺佢後面。」事主指老翁持續「chok痰」，而且聲浪實在太大，「點都避唔到」，當時附近食客都留意到該老翁，而事主「真係反胃食唔落走人」，又指離開前有向職員投訴，建議將涉事杯碟全部棄置，因為好難洗得乾淨，「阿姐話會，希望係真」。事主明言事件與店方無關，而且老翁可能有病或不舒服，「但佢嘅行為唔單止令人真．反胃，仲有高度傳播病毒風險」。

網民高呼核突　「啖口水都想嘔返出嚟」

「仲以為係嘢飲，原來成半杯都係痰，好核突呀！」、「救命我睇嘅時候唔小心吞咗啖口水，睇完之後連自己啖口水都想嘔返出嚟！」、「就算唔睇圖，睇啲文字想像到已經反晒胃」網民紛紛留言直指類似事情「屢見不鮮」，批評「好污糟，好自私」。