意甲｜拿玻里2比0勝卡利亞里　第4次封王

【有線新聞】拿玻里贏得意甲冠軍，煞科戰主場2比0擊敗卡利亞里，第4次封王。

淺藍衫拿玻里賽前領先第2的國際米蘭1分，贏就肯定捧盃，拉斯柏度利的割草式射門，柱邊出底線。同時間開賽的國米20分鐘領先，拿玻里暫時跌到第2，史賓亞蘇拿連續兩次起腳，過不到卡利亞里的血肉長城。

拿玻里上半場15次攻門，踢到42分鐘，麥湯文尼攻入關鍵一球，接應傳中、車身射入，又搶回爭標主動權，跑到觀眾席與球迷齊齊慶祝；加盟拿玻里首季聯賽上陣34場，交出12入球、6助攻，當選意甲最佳球員。

換邊後，另一位前曼聯兵盧卡古展現功架，帶足大半場，被卡利亞里守衛纏著都射過出迎門將，51分鐘為拿玻里拉開，冠軍再穩陣點了。剛過32歲生日，盧卡古之後想造就隊友，利尼斯起腳被撲，未能錦上添花。

國米贏科莫2比0都無影響，拿玻里淨勝兩球，相隔一季再度奪冠。先後在祖雲達斯及國際米蘭封王，干地上輪聯賽被趕出場，煞科戰無緣在場邊領軍，都成為第一位帶領3支意甲球隊登頂的主帥。拿玻里在主場馬勒當拿球場第4次高舉意甲冠軍，來季將重返歐聯。

白衫國際米蘭作客擊敗科莫，隊長迪維積接應角球頂入，20分鐘領先。國米完半場前，有達利美被科莫門將拉爾拿禁區外鏟跌，球證翻看視像後直接出示紅牌。踢多一個的國米祖亞昆哥利亞換邊後窄位射入，51分鐘鎖定贏2比0，完成煞科戰任務，最終落後拿玻里1分、第2名完成，歐聯決賽對巴黎聖日耳門，成為今季爭標最後希望。