網傳外企HR公審求職者 Threads洩電郵內容惹公憤 寸爆「咁大牌真係幾fun」

【有線新聞】社交平台盛行,凡事公審往往可能自討苦吃。一名任職外企人事部員工早前在社交平台公開求職者電郵內容,嘲諷對方因旅行更改面試日期「耍大牌」,更嘲諷「你不如唔好搵工啦」,言論刻薄且涉嫌洩露私隱,引發網民激烈抨擊。不少網民湧入其公司社交平台投訴,公司強調重視私隱,正全面調查。
HR公開電郵嘲諷求職者 「你不如唔好搵工啦」
有自稱任職人事部的打工仔日前在Threads上載一封電郵截圖,內容顯示有求職者因旅行行程,希望將面試日期由10月底改為11月初。該員工公開揶揄:「你不如唔好搵工啦,我就唔知阿姐會點覆,不過你咁大牌,真係幾fun,仲要就你到下月,你邊位?」她更批評求職者履歷上的電話號碼有誤,稱「已經email你,咁嘅回覆,holy」。
帖文引發網民一面倒狠批,留言斥責其言論尖酸且涉嫌違反私隱,缺乏職業操守,「你咁樣cap人哋段email上嚟,佢見到嘅話等投訴你」、「嘩呢啲公司原來咁處理啲敏感資料㗎,仲放心同佢做生意?」不少人認為求職者改期理由合理,「面試撞正去旅行,話同你改期都要畀你公審?想點?」
強硬反擊網民 繼續鬧爆求職者「無心」
面對網民圍剿,發帖者未有收斂,繼續以強硬態度回擊,稱事件重點在於求職者「有冇心」,「其實呢,成件事唔係佢放唔放假嘅問題,係有冇心,OK?資料填錯,仲要人哋就佢幾時,你話你返緊工都算,去旅行時間好flexible吧」。她又指,首輪僅為網上面試,即使去旅行亦可進行,「買個支架唔難啩?買件恤衫唔難啩?」、「如果你話人哋放緊假,係呀係呀咁你放假啦,又要放假又要搵工,但又要人哋等你放完假先肯見……都仲覺得冇問題嘅,多數你哋都幾有問題」。
此番言論火上加油,網民批評其毫無同理心,甚至有人「起底」,大批網民湧入涉事公司社交平台投訴,批評其職員洩露求職者個人資料,私隱管理漏洞令人失去信心。
刪帖設私人帳戶 百字挑釁再惹火
隨著網民「起底」及投訴浪潮升溫,發帖者隨即刪除相關帖文,並將Threads帳戶設為私人,試圖平息風波。然而,有網民發現其個人簡介再更新逾百字內容,疑似挑釁網民:「唔用真身嘅都係shit,靜下啦!撳入嚟睇我你就輸咗喇,傻仔,議事論事啦,茶言茶語的『綠茶』,滾出Threads啦,冇文化冇logic嘅呢,我睇唔過眼就會block,go to hell la」。
此舉再掀眾怒,網民震驚其態度囂張,「公開私隱唔道歉,仲挑機網民,呢啲HR點請?」面對網民的投訴,涉事公司回應網民留言時,強調高度重視個人資料私隱,已展開全面調查。而私隱專員公署回應傳媒查詢時,證實已接獲一宗相關投訴,會按既定程序跟進。