英格蘭足總盃｜車路士5比1大勝英冠查爾頓　阿士東維拉2比1淘汰熱刺

【有線新聞】英格蘭足總盃第3圈，車路士作客以5比1大勝英冠的查爾頓。

藍衫車路士的後衛今場十分有入球運，哈度展示腳頭，上半場補時4分鐘轟入加盟後首個入球。換邊後中堅艾達拿拜奧跣入遠柱，50分鐘拉開。7分鐘後查爾頓回敬角球攻勢，米爾斯勒賓補中，英冠4場不勝，入回一球，至少安慰一下主場球迷。

車路士在英超5場未贏過，趁機反彈，馬克基奧62分鐘「執雞」，再拉開2球優勢。煙霧瀰漫無阻車路士，補時都多入兩球，柏度尼圖一扣，推大位射近柱建功。艾斯迪華奧被門將撲跌，博多個12碼。安素費南迪斯射入，車路士贏5比1，晉級第4圈。新主帥羅仙尼亞有個好開始。

兩支英超球隊碰頭，黑衫阿士東維拉作客2比1淘汰熱刺，貝安迪亞抽網頂，22分鐘維拉反客為主。同一對進攻組合，馬倫交給貝安迪亞，這次後腳再撞予摩根羅渣士，射地波入網，半場2比0。熱刺今場兩度「食詐糊」，只有威爾遜奧度拔54分鐘這球算數。熱刺近7場輸第4次，阿士東維拉贏2比1過關。