英格蘭足總盃　利物浦作客3比1擊敗狼隊晉8強

【有線新聞】英格蘭足總盃16強，利物浦作客3比1擊敗狼隊晉級。

紅衫利物浦力爭報回日前英超一敗之仇，加普頭槌頂中柱，被狼隊門將莊士東接實，都越位在先。「紅軍」上半場攻勢多，未能威脅莊士東，尼古姆夏窄位起腳被封。蘇保斯拉的罰球射中人牆彈橫，加雲比治補射被莊士東沒收，半場0比0。

利物浦的努力換邊後有回報，居迪斯鍾斯橫傳，羅拔臣離門25碼拉弓，射破莊士東的十指關，51分鐘為球隊打開缺口。今季聯賽只正選上陣5場，一度盛傳轉投熱刺，這位蘇格蘭左閘用行動證明自己。他兩分鐘後再送出漂亮助攻，沙拿後柱趕到撞入，一度被指越位在先，經VAR覆核後球證判入球成立，利物浦拉開2比0。

「紅軍」得勢不饒人，居迪斯鍾斯個人突破，推到「娥眉月」起腳，74分鐘進一步擴大比數，與羅拔臣看齊，同樣有一入球一助攻。未能保住清白之身，補時1分鐘輸反擊，黃喜燦射入為狼隊「破蛋」，都無阻利物浦贏3比1，晉身八強。