IKEA霸床玩手機瞓著　遭「無良」途人踢走雙鞋　網民驚訝：冇著襪咁盡！？

【有線新聞】IKEA「霸位黨」向來惹人討厭，阻礙真正有意買家俬的消費者試用，近日更有「霸位黨」公然躺在展示區的床上玩手機，玩到睡著，結果被他人踢走鞋子，遍尋不果，引起網民熱議。

安躺如自己家中　「個樣都瞓得幾安詳」

大熱港產片《毒舌大狀》、《夜王》導演吳煒倫本月2日在社交平台發文，講述多次遇上「霸位黨」，想試坐通常都會遭佔用者白眼，「我試過俾佢鬧添，話我搶佢個位坐」，「今日，進化了，床都有人瞓。我之前未見過人瞓床的。今日嗰位先生，除咗對鞋，成個人瞓喺張床上面玩手機，自己間房一樣，之後見佢好似真係瞓著咗，個樣都瞓得幾安詳」。

吳導指其後有位「好無良」人士，踢走「霸床男」一雙鞋子，而且「踢到好遠，冇可能搵到」。「霸床男」瞓醒後發現鞋子不見了，「赤腳咁周圍搵，搵唔到」。吳導直言「霸床男」好陰功，「出街冇鞋著，今日又落雨又盛，行出去對腳濕dep dep咁，又污糟，黑鼆鼆咁，真係好慘，人神共憤。唉」

黑色幽默如電影　網友：世界艱難，無鞋照行

吳導其後逛MUJI時，又遇上另一名「霸位黨」，他「有張凳想試，有位小姐坐咗好耐，埋去禮貌地問佢可否讓一讓開俾我試吓，佢話佢等緊人。嗯，佢有著鞋的。」

貼文吸引不少吳導網友留言，有人形容「成件事好fun，好comedy」、「呢個世界上只有你諗唔出嘅橋段」，又發現「霸床男」似有扁平足及腳趾外翻，「無鞋著仲慘」、「冇著襪咁盡」，亦有人表示「這是一個悲傷的故事」，又二創《夜王》中黃子華的對白稱：「世界艱難，無鞋照行」。