車CAM片｜盲彎內側突現修路工 「零警示」驚險擦身而過 網民怒轟害人害己
【有線新聞】晚間開車光線不足，真的要打醒十二分精神，有車主近日就在社交平台分享「車Cam」片段，可見當時駕車過彎時，在「盲彎內側」突然出現兩名修路工，幸好司機不是壓線，也及時收油，未釀成意外。片段引起網民熱議，均直指路面雪糕筒、指示燈欠奉，「佢哋真係執返條命」。
直路再有多名修路工 有人路中間工作
影片中可見到，當時私家車正常速度入彎，右方盲彎內側突然有人伸手示意，惟幸修路工有穿上反光背心，加上司機未有分心，提前留意而作出反應。不過，片中可見修路工所站位置似乎「太出」，即使私家車不是靠右壓線，車頭也是與修路工接近「擦身而過」，相當驚險。
當私家車過彎後，小直路上再有多名修路工在工作，雖然他們都有穿上反光背心，但路面同樣沒有雪糕筒、指示燈。其中一名修路工更走出路中間工作，私家車立即減速，修路工才不慌不忙走回路邊。車主在貼文中直指「啱啱甩P就搞啲咁嘅嘢，差啲（撞到）一堆好爸爸」，又在留言補充：「青山公路準備入葵涌段」。
車主：差啲一堆好爸爸 網民：執返條命
「依家啲工程車都痴ｘ線，雪糕筒又唔放，提示又冇，真係唔小心撞到又入司機數！」片段引起網民熱議，大罵工程公司害人害己，「仲要企响個轉彎位，欄杆矮牆遮住視線，好危險」、「應該政府請既外判公司黎，1823啦……真係害死人」、「呢隻彎都好興劈住入，佢地真係執返條命」、「頭幾秒右邊A柱盲位已經2件，真係好彩，有d人揸車鍾意壓哂一邊黎行，咁樣就收皮」、「up條片上嚟都有警世作用，條片就見唔到cam主有咩錯」。
