坐非關愛座遭老婦命令讓座　港鐵男怒斥態度惡劣　雙方羅湖「激戰」到火炭

【有線新聞】乘車讓座爭執時有發生，網上近日瘋傳一段乘客在港鐵車廂內對鬧的影片，一名老婦疑用命令式口吻要求一名年輕男子起身讓座，雙方爆發激烈口角，雙方由羅湖站一直互罵至火炭站，最終老婦不敵對罵聲浪，在中途下車轉線，臨行前更拿出手機拍照企圖「公審」事主。事件引起網民討論，不少人批評涉事老婦行徑野蠻，直言「敬老係首先對方要有禮貌」。

老婦命令讓座引爆衝突　港男怒斥：老奉呀？

根據事主上傳的影片可見，涉事老婦的手部疑受傷綁上厚厚繃帶。影片一開始，老婦即用命令口吻表示：「喂！你起身畀我坐呀。」男事主聞言情緒激動，爆粗質問老婦：「老奉呀而家？」老婦則理直氣壯指：「而家想點呀？叫你起身，你後生仔……」男事主隨即反駁：「係咪老奉先？唔該都冇一聲。你講嘅，我會起身。但唔係你一行埋嚟，我工人呀而家？你畀X咗錢我呀？」此時，其同行女朋友亦幫口，指若老婦身體不舒服可以禮貌詢問，而非直接命令人起身。

面對兩人的指摘，老婦顯得相當不滿，反問「你兩個鬧夠未呀？」甚至一度挑釁稱「你打我囉」。男事主則憤怒批評對方態度惡劣，「你本來咩態度呀？你問下咁多個呀，一入嚟乜X野事呀！」其女友亦在旁附和，直斥老婦：「唔好扮晒老人家大晒啦」。其間多名乘客嘗試上前勸阻，有乘客擔心衝突升級，好言相勸：「後生仔唔好衝動，返咗差館就麻煩啦」；亦有乘客看不過眼，發聲力撐事主，「後生仔係冇錯」。

不滿老婦欠尊重　港男：尊重係彼此嘅

事主在文中補充指，事發在昨日（25日）晚上約11時，當時與女朋友由羅湖站登上東鐵線列車，並強調所坐的並非關愛座，「呢個啊婆衝入嚟指住我一個叫我起身俾佢坐，我嬲嘅位係佢衝入嚟命令我起身。」事主直言，當時被對方的舉動嚇了一跳，一時間反應不過來，他坦言自己清楚對方是長者，若對方好好溝通，他一定會主動讓座，但最令他氣憤的是對方的態度問題。

事主指，自己由羅湖一路與對方理論到火炭，最後老婦疑因不敵言論而落車轉乘另一班車，更在下車前不斷舉手機拍攝事主容貌，「我冇所謂一直企喺度俾佢影， 我又冇做錯怕乜。佢都咁樣嘅時候，我都唔使禮貌對待佢啦，尊重係彼此嘅。」

網民力撐事主：敬老係首先對方要有禮貌

事件引發網民廣泛討論，大部分網民力撐事主，批評涉事老婦行徑野蠻，「敬老係首先對方要有禮貌」、「你有需要我讓你坐係我人品好，但你呼呼喝喝唔識禮貌我咪教你囉，兩件事無衝突」、「要讓位可以，但首先要有基本禮貌先。另外唔好恃老賣老，我都好討厭呢啲人，老唔係大晒」、「年紀大，隻手傷咗，唔舒服，唔企得，點解唔叫救護員？」、「而家啲人點解覺得野蠻就絕對著數？」此外，有年輕網民大吐苦水，指在香港「年輕是原罪」，透露自己亦曾於下班乘車時，在非關愛座被無禮逼讓座。

不過，亦有少數網民稱各打五十大板，形容事件是「MK仔大戰老奉阿婆」，認為雙方都有問題，更感嘆為何現時香港人每日都會為了座位問題在車廂內吵架。

另外，對於有網民質疑既然不滿對方態度，為何最終仍要讓座，事主事後再無奈回覆，解釋「如果我唔讓佢坐，人哋會話返我點解唔讓老人家，咁就變咗我錯」。他最後強調，自己並非針對所有長者，「但有部份老人家搞到其他老人家都令人覺得係衰人」。