一日兩宗兩地牌私家車剷行人路　險撞途人　網民怒轟：視一切如無物

【有線新聞】網上近日瘋傳兩段驚險車輛違規影片，涉事車輛均掛有兩地牌，並不約而同駛上行人路，險象環生，引起網民討論，不少人怒批「完全唔駛遵守規則」、「為所欲為」。

司機逆線「剷」上行人路　網民：仲有小朋友啊

其中一段瘋傳的片段發生在沙田乙明邨附近，從片中可見，一輛掛有兩地牌的黑色寶馬私家車，突然開上路邊的行人路，並沿著狹窄的行人通道行駛，當時行人路上仍有不少市民正在步行，場面極度驚險。有目擊者表示，當時該輛黑色車在斜路綠燈前突然「定格」未有行駛，結果被後方旅遊巴大按喇叭催促，「之後唔知佢係驚青定點，直接開咗去對面逆線，對面架紅的差啲撞落去，嚇到瘋狂呠佢。」黑車司機最終在慌亂之下，直接剷上行人路避難，又指「當時仲有小朋友係行人路，好彩家長醒水捉實個小朋友拉一拉佢…我呆咗，懷疑當時兩架紅的差少少就出車禍。」

網民怒斥：當自己玩緊孖寶賽車？

影片一出，留言區隨即被網民洗版，不少街坊怒轟司機目無法紀，怒斥「視一切如無物」、「好癲，行人路上面仲要有人」、「嘩，有幾個人喺行人路都照駛上去行，目無法紀」、「咁唔係仲衰過直接衝紅燈？」、「衰過逆線」。住附近的街坊亦深感恐慌，指「我係街坊，呢個位平時好多學生、老人家經過」、「馬路計時炸彈，行人毫無保障」。 另有網民嘲諷：「吓，揸埋入商場呀嘛」、「精英，咁大條馬路唔行，行條窄咁多嘅行人路，係咪想show off車技」、「佢嗰下當正自己係行人」、「捷徑呀！有玩過孖寶賽車就知」、「行得上行人路就要跟行人紅綠燈！」。亦有網民質疑考牌制度，「無牌都識啦，個牌點返嚟」、「兩地牌車應該要大幅加保費」、「仲唔重視呢啲情況？遲早有大鑊嘢」。

銅鑼灣FU牌私家車直衝過路處　拍片者：以為死神來了

另一段同樣驚心動魄的片段則發生在人流極高的銅鑼灣崇光百貨門口，事發於10月20日下午約2時，片中可見一輛掛有「FU」字頭車牌的私家車，在路口轉彎時直接車頭「剷上」過路處行人路，停頓十多秒後才急轉駛回馬路。當時現場人頭湧湧，不少行人目擊車輛逼近，拍片者更直言當時場面極嚇人：「㗎車剷上嚟嗰下以為死神來了」。

網民嘲諷：真係大地由佢行

私家車「攻陷」銅鑼灣鬧市行人路的片段曝光後，再激起網民憤怒，痛批「完全唔使遵守規則，真係大地由佢行呀」、「為所欲為」、「魯莽駕駛、危險駕駛」、「蓄意謀殺！」、「冇人報警？」有經常途經該處的市民就指「呢個位其實唔係第一次，次次企呢度過馬路都唔會睇電話」、「最慘唔係諗住過馬路，行緊行人路都要小心」。甚至有網民質疑司機是否跟導航行錯路，笑言「點解會覺得條行人路係馬路？」、「爭啲以為高德地圖話俾入，原來都係唔得」、「高德會因為有人行過嘅捷徑而改地圖，好快高德就會教人咁行」。