網絡熱話｜荃灣單車男緊貼貨車尾「破風」行駛　接近零距離惹爭議　網民怒批：搵條命較飛

【有線新聞】近日網上流傳一段驚險影片，一名男子騎踏公路單車緊隨一輛貨車車尾，在車流中穿梭。事件引起網民熱議，有人揶揄「高手破風」，更多人憂慮司機盲點及行車安全，直指貨車若急煞車，恐釀傷亡事故。

單車慢線切中線　緊貼貨車車尾

影片疑由尾隨的巴士上層乘客拍攝，全長約30秒。根據畫面顯示，事發地點相信是荃灣青山公路往大窩口方向，涉事男子騎踏公路單車駛至荃灣花園富貴閣對開路段時，一直與前方貨車保持極近距離，緊貼其車尾行駛。

期間，該單車更跟隨貨車由最左邊慢線轉往中線行駛。男子在切線時，曾一度向後方揚手示意，後方客貨車見狀亦隨即減慢車速。

網民揶揄「高手」：享受緊被破風時刻

拍攝影片的網民在社交平台帖文中不禁稱奇，留言諷刺：「貼到咁埋，同前面架貨車識㗎？」影片迅速在網上發酵，有人揶揄「減少風阻，高手之中嘅高手高高手」、「諗住搵到個有份量嘅破風手，唔好放過呀嘛」、「不如直頭捉住個貨車尾等佢拖你行啦」、「食住車尾氣流，慳好多力，有料」、「你哋識咩吖，佢係用緊四驅車入面講過嘅滑流走法啊」、「享受緊被破風的時刻」、「唔使遞手都讓你啦」。

有網民對此玩命行為表示震驚與憤怒，直言幸好未有釀成事故，「完全盲點位，一煞車佢就…唔煞車佢都係食廢氣」、「睇唔到前面交通情況，一啲都唔驚？」、「如果貨車急停…」、「揾條命仔較飛，前車急停，後果？」、「單車無牌可考慮禁上公路？」。

根據《道路交通條例》第45條，任何人在道路上魯莽或不小心騎踏或使用單車、三輪車或多輪車，即屬犯罪。如屬首次被定罪，可處罰款500元，再犯者可處罰款1,000元及監禁3個月。