安全帶｜「扣罅」恐淪昆蟲安樂窩　網民搭巴士拉安全帶　意外驚醒「小強」橫行

【有線新聞】強制佩戴安全帶法例已正式生效，違例者最高可罰5,000元及監禁3個月，卻意外引發不少市民關注巴士座位衛生問題。近日有人在Threads出片，見到巴士座椅上有疑似曱甴爬行，不少網民紛紛留言指巴士座位藏污納垢，更有人指「今個月內都唔會搭巴士小巴」。

出片揭曱甴橫行　事主：驚魂未定

有人在社交平台上載片段，見到有一隻疑似小型曱甴在座椅罅隙旁爬行，座椅圖案可見事發於九巴車廂，事主附上文字稱「準備戴安全帶，點知嘈醒咗佢」。無獨有偶，有網民亦遇上類似事件，相片同樣見到體型如拇指頭大曱甴疑似現身車廂，事主似乎心有餘悸，爆粗怒斥「垃圾安全帶！差啲搞到我走唔切」，又指眼見曱甴慢慢逼近，形容當時「個心真係就嚟跳出嚟」。

多則帖文曝光後紛紛惹來大批市民共鳴及熱議，不少人都狠批巴士衛生狀況，指「小巴同巴士真係好多蟲」、「啲窿窿罅罅勁污糟」，更有人諷刺道「佢先至係原住民呀！反而仲覺得打攪咗佢哋㖭」、「佢唔識用安全帶，幫下佢啦」。有網民更分享親身經歷，「試過爬上我隻腳，驚到叫唔出聲，嗰下勁快撥走咗佢，立即落咗下層企。覺得以前啲巴士好似乾淨啲，近呢幾年覺得好污糟。」

網民嘲新例「強拆」曱甴屋　寧願「企下層」

有網民分析指過往甚少乘客主動佩戴安全帶，罅隙恐怕早已淪為曱甴的「安樂窩」，如今新例變相是「強拆」其居所，令潛伏已久的昆蟲「全線現身」。亦有網民踢爆稱，「識人做巴士清潔工，有啲懶鬼根本無抹，抄咗個車牌、抄同事抹咗啲number就當自己做咗，主管嚟檢查先扮嘢」，擔憂隨天氣轉熱，安全帶積聚汗味體液卻未徹底清潔，衛生狀況恐更惡劣。

事件令部分乘客對使用安全帶卻步，有網民坦言寧願「企下層」亦不敢坐下扣安全帶，「諗下佢飛咗落你身上面，然後你仲要解唔到安全帶」。更有人表示短期內改搭其他交通工具，「至少今個月之內都唔會搭巴士小巴，好彩仲有得揀」。

就車廂衛生及新例實施，九巴及龍運指每輛巴士每日至少進行兩次基本清潔、每兩周作徹底深層清潔，均涵蓋清潔和消毒安全帶，而定期檢驗內容亦包括全車安全帶運作。城巴則指留意到新例實施後安全帶使用率顯著提升，已加強全面清潔與保養，並增派人手宣傳新規。