足總盃｜陳肇鈞梅開二度　大埔2比1擊敗東區捧盃　

【有線新聞】本地足總盃決賽，大埔2比1擊敗東區奪標。

綠衫的大埔早早入局，沈承賢射地波，僅僅中柱彈出。罰球攻勢，對方守衛頂落加比爾身上，陳肇鈞近門趕到，14分鐘大埔領先。季初已贏得高級組銀牌冠軍，力爭再奪盃賽錦標。東區上半場難得反擊機會，里奧有隊友不交，勉強起腳，無角度、無力度。大埔再下一城，帕特華維迪被撲，陳肇鈞又補中「執雞」，補時拉開2比0。

換邊後，東區終於多點控球。安迪勁射近柱，被盧兆崎擋到。再緊湊一點，大埔的費蘭度手球。球證看完重播，判罰12碼。華倫天奴操刀，88分鐘東區追近。狂攻大埔，盧兆崎手槌打空，華倫天奴差點追平，被杜國樑護空門。顧斌罰球直射，同樣不行。大埔有機會穩陣點，保連奴被門將保羅撲跌，獲得12碼。馬高斯山度士射中楣，大埔都贏2比1，捧走足總盃冠軍，取得來季亞冠二參賽資格。