美孚站疑現「踩腳佬」專揀OL落腳 遭喝斥後急步走人 事主強調非誤會：好肯定特登
【有線新聞】社交平台近期屢現針對女性騷擾的舉證影片，港鐵美孚站近日就出現一名疑似「專踩OL鞋」的怪異男子，事主指自己已親身中招兩次，更兩度目擊有其他人被踩，呼籲「女仔經過美孚站要小心」。
上班時間出沒 辯稱「玩電話冇睇路」
事主描述涉事男子「孭背囊、帶帽、戴眼鏡」，經常於早上8時至9時的上班繁忙時間出沒，指控「特登搵女仔對鞋嚟踩」，直言受害人「輕則踩甩對鞋，重則仆倒」。事主聲稱自己已先後兩次被該男子踩中，並曾親眼目睹另外兩人中招，「擺到明就係特登搵人嚟踩！」
「今次我真係唔X忍啦！ 真係興奮，終於俾我再遇到佢！」事主指日前再次在站內遇上該名男子，對方竟再次重施故技，忍無可忍之下當場大聲喝斥反擊。對方見狀隨即辯稱自己當時正「玩電話冇睇路」，隨後便匆忙加快腳步。女事主在回覆中直言「觀察到佢係鍾意踩人啲女仔返工鞋！」帖文隨即引起網民熱烈討論，「身有屎呀所以行咁快！」亦有網民分享類似經歷：「之前有遇過打側踢我高跟鞋跟，同人講仲俾人話我諗多咗。」、「上次俾佢踩到冇出聲，我已經幾晚瞓唔着」。
網民籲報警 「可以告普通襲擊？」
有網民則提出可能是誤會，「講真嘅，有時碰到真趕時間返工嘅人，而前面有個睇手機又慢慢行（所以有啲事有因有果，不一定是針對人）」，事主回覆：「 但係第一次俾佢踩完之後，有緣同佢相遇第二次，撞到佢望住人哋隻鞋嚟踩！再我第二次俾佢踩到之後，答案唔係好明顯咩？」，「被踩嘅嗰吓，第一時間都會諗到人哋可能係唔小心，好似我第一次俾佢踩到咁！但呢一個，我真係好肯定佢係特登！」
不少人留言表示香港近期「怪人」愈來愈多，有網民提醒輕鐵站經常出現故意「kick腳」情況，西鐵站則有「踩鞋」事件，呼籲女士們要格外留神。更有人建議事主應報警處理，直指「有證據，係刻意嘅，係咪可以告佢普通襲擊？」
