一線搜查｜八旬婦中風失語　加入合唱團重拾人生　腦神經音樂治療激發希望

在香港，有一個失語人士組成的特別合唱團——香港復康會樂隨風合唱團。他們因中風失去說話能力，甚至曾經對生活及自己都失去希望，但透過歌聲，他們不僅重拾自信，更以堅韌的生命力鼓勵其他身處困境的人不要放棄。

突中風失語　八旬婦：我當時好驚、驚唔識講嘢

83歲的黃玉蕊是合唱團的一員。2023年，她突發中風，手腳無法動彈，連一句話也說不出，幸好兒子及時發現，送往醫院進行手術。「我醒返之後，我仔睇我，我想講嘢，但講唔出，淨係可以眼望住佢哋，乜都講唔到。我仔俾咗紙同筆我，我寫我好驚，我驚我唔識講嘢。」

黃玉蕊中風前是個有魄力的女性，一邊照顧中風的丈夫，一邊從事製衣批發銷售，經常往返香港與內地。然而，中風讓她的生活瞬間停擺，要經歷一段漫長的復康之路。黃玉蕊憶述：「好多人打電話，我唔接，因為我心諗我如果接，我唔識講嘢，佢哋就知我有事。初頭我唔想俾人知我有事，所以我（將）自己收埋。（我）梗係唔開心，因為自己冇辦法出去，想買嘢都唔得，因為講唔到嘢。我驚，行路都未好穩，所以當時我都好擔心。」

腦神經音樂治療　助失語者重拾希望

出院後，言語治療費用高昂，每45分鐘動輒過千元，黃玉蕊選擇在家自學苦練，希望能夠重新說話。「開始我可以講多啲嘢之後，我覺得我進步得唔係好好，所以我開始諗，如果我成日喺屋企，一定唔會有進步。」一次偶然的機會，香港復康會的姑娘介紹她加入樂隨風合唱團，從此開啟了她的復康新篇章。

樂隨風合唱團由音樂治療師梁凱琳及鍾敬文帶領，專為中風失語症康復者設計。梁凱琳解釋：「我們會做多啲口肌練習、呼吸練習，希望幫佢哋郁多啲個口、改善佢哋發音或講嘢流暢程度。而合唱團目標在於等佢哋有更多社交互動，多啲表達自己，等出面社區嘅人士更加知道我哋嘅需要。」

鍾敬文在澳洲求學時，曾被當地中風失語症康復者合唱團的表演深深感動，啟發他將腦神經音樂治療帶回香港。「音樂唔單止刺激一個腦區，當玩音樂或聽音樂時，整個腦區都會發生唔同刺激，包括言語區、情緒、記憶等都可以被刺激。」他指出，對於左腦中風導致的表達性失語症患者，音樂治療能繞過受損的言語通道，幫助他們重新表達。「佢哋聽得明你講咩嘢，佢哋亦能夠諗到你自己想講咩，但講唔到，因為條橋受損咗。腦神經音樂治療就係透過旋律、音樂，用熟悉範疇繞過受損嘅渠道，從而令佢可以用言語表達出嚟。」

冀透過歌聲感染同路人　治療師：佢哋對生命嘅堅持、對人嘅愛

黃玉蕊認為自己的康復進度已達七成，而先生則是她努力的動力，「我先生都係中風者，佢需要我嚟照顧，我有時自己都會流眼淚，因為我覺得我幫唔到佢，我一定要快啲好返。」而歌聲亦讓黃玉蕊重拾對生活的信心，「我唱歌時，我可以忘記一切，投入唱歌，一齊唱歌，自己就開心好多。」

梁凱琳表示，合唱團積極邀請團員在公開場合分享故事，希望透過表演和經歷感染他人，「希望透過他們的康復經歷，或當下唱歌力量，感染其他人，鼓勵其他同路人不要放棄及繼續努力。」鍾敬文則被團員的生命力深深感動：「佢哋經歷人生好大嘅轉變，但今日竟然咁有動力堅持行落去。已經唔係能夠用言語量度，唔係話講咗幾多字、唱到幾多首歌，而係佢哋內在嘅生命力，對生命嘅堅持，對人嘅愛，對自己嘅愛。」