一線搜查｜中環天橋樓梯變「街邊足療」　批腳皮、剪甲聲不絕　市民怒斥影響市容

中環作為香港金融中心，每日有成千上萬的人流，惟近日有網民發現中環站A出口連接國際金融中心的行人天橋樓梯，竟變成「街邊足療店」，現場傳來「噠噠噠」的剪甲聲，甚至有人坐在梯級批腳皮、塗指甲油，直批「行上去每一步好似食晒啲腳皮嘅feel」。有區議員向《一線搜查》表示警方三年接獲約20宗相關投訴，惟問題屢禁不止。

天橋樓梯成「街邊足療店」　批腳皮、剪甲聲不絕

根據網民上載影片顯示，中環站A出口行人天橋樓梯，有人坐在梯級為一位長者做足部按摩，樓梯較高位置更有人排隊等候。片主指除了按摩外，更有人提供修腳皮服務，直言由於現場很大風，「行上去每一步好似食晒啲腳皮嘅feel」。

《一線搜查》攝製隊平日中午到場視察，發現樓梯左右扶手掛滿袋子，梯級間放置小椅子，有人坐梯級休息、食飯，甚至有人在修甲、塗腳趾甲。繁忙時段，路人只能從中間狹窄通道通過，容易造成堵塞。

有市民直言難以接受，「有啲核突，喺商業大廈度做街邊美容，就差咗啲」、「第一唔衛生，第二阻住人行，同埋都唔美觀啦，呢度係香港嘅金融中心，咁咪好難睇」、「放工5、6點，好多應該係啲菲律賓人，幫人哋按摩、剪指甲，好多。行過時有陣味，同埋好多油驚跣腳。一定阻（行人），得返條好細路仔，中環好趕時間㗎嘛」。

區議員：問題屢禁不止　舉證有難度

中西區區議員施永泰指出，中環站A至J出口一帶均被列作食環署小販黑點名單，問題屢見不鮮，這些行為除了阻礙市民出入，亦非常影響市容，「如果你行行下街，左邊有個人喺度批緊腳皮，咁你吸入嗰啲唔係芝士粉，係腳皮，都相當嘔心。」

他指出，過去警方及食環署曾作出執法，惟舉證困難，「平時小販買賣舉證容易，但提供服務需要錢銀交易，證明確認為賺取收入才構成違規。若用電子支付、無現金交收，就難以即時票控或拘捕。」他建議署方多巡查、作出勸喻，「雖然未必即時構成非法擺賣，但阻街及影響市容大家都同意，希望有關方面加強驅趕。」至於有意經營者，他認為應覓合適場所合法經營。

警方三年接20宗投訴　律師：涉兩項罪行

中區警區回覆區議會指，過去三年於環球大廈一帶共接獲15宗人群聚集阻塞通道投訴，以及5宗懷疑違規擺賣投訴。

執業律師梁永鏗指出，有關行為等同街邊無牌提供服務，可能干犯《公眾衛生及市政條例》小販規例，最高罰款5,000元及監禁3個月；若將腳皮等廢物棄置公眾地方，更可能觸犯《簡易程序治罪條例》公眾地方妨擾罪，最高罰款2,000元及監禁3個月。