一線搜查｜單車籃「浪漫」載女生 極易自炒撼爆頭 區議員嘆：學生家長都係咁
將軍澳、荃青等單車徑網絡發達地區共享單車盛行，但不時都出現「單車籃載人」的險象，而且不單只年輕學生會冒險，甚至有家長照放年幼子女「上籃」一但炒車隨時抱憾終生，區議員及共享單車營運商均明言接獲投訴眾多，冀市民注意安全。
共享單車服務廣受年輕人歡迎，踩車返學、返屋企、去車站，已經成為生活日常，但不時都見有學生「另類示範」共享單車，男生就奮力踩、女生就坐在車籃睇手機，相當危險。
《一線搜查》近日走方訪將軍澳區，不少學生、街坊都明言經常遇見，「中學生應該，好多，好多，仲爭啲炒埋一齊」，「通常坐籃嗰啲，全部都係細路仔嚟嘅。個大人就有時就會好快，仲有一次撞到我，然之後我都跌埋」，「真係有啲嚇親啊，點解可以咁危險」，「好容易跌落嚟。佢會阻住個男仔望前面啲路啊」。
西貢區議員陳繼偉表示區內共享單車服務盛行，同時亦帶來不少亂象，「不時見到有車籃載人，擔心一旦發生意外，後果不堪設想。本身單車違規都好多居民反映，有唔少都系關於車籃載人，通常載嗰啲比較小朋友或者學生嚟嘅，我親眼都見過有幾次」。陳繼偉指區內每兩個月都有四五十宗單車意外，認為要杜絕車籃載人等不當行為，「揸單車可以跳車啊，喺個籃度根本完全冇啊，變咗好難着陸。有啲好細嘅小朋友，如果擺個欄度咧，要一跌或者一撞咧，就會好受傷嘅。」
按現行法例，在道路上騎單車或者三輪車不得運載任何其他人，違反者可處罰款2,000元。共享單車營運商都留意到車籃載人的問題，並在社交平台發文提醒用家。營運商總經理吳君寶:「如果你話真係坐一個人上去，絕對超出咗負荷。（本身負荷）5公斤左右，變咗頭重尾輕，轉向唔好嘅時候就好容易失去平衡，又或者偏離角度撞到其他人，我哋都接獲唔少嘅投訴……尤其比較多戚一啲學生嘅，如果我哋認得出邊間學校，都會嘗試聯絡返學校方，做返安全教育……提醒返佢哋貪一時之快，有意外嘅話隨時抱憾終生。」
醫生張永德指如若發生意外，輕則擦損手腳、嚴重就可能骨折，甚至乎嚴重腦部創傷、腦出血，而車籃中的小孩受傷風險更加嚴重。國際專業保險諮詢協會會長羅少雄亦指單車載人已經違規，，出事的這很可能影響保險索償。
HOY 78：《一線搜查》
播出日期：逢周一至五
播出時間：晚上8時HOY 77首播、8時半HOY 78重播
WhatsApp報料熱線：68960931
節目重溫請＜按此＞
