曼聯U16訪港　7比1大勝香港U16　童祈樂遠射破蛋贏盡掌聲

【有線新聞】曼聯U16訪港，在旺角大球場以7比1大勝香港U16。

曼聯名宿卡域克之子謝斯長傳，接應的甘倫扣過門將射入，為白衫曼聯先開紀錄。雨中作戰，曼聯沒有怕，謝斯交出今場第2次助攻，艾菲占士找到「私家路」，繼星期五鬥超青聯選手隊後再有進帳，曼聯傳奇門將舒米高都有入場見證一班小將發揮。

換邊後雨勢減弱，甘倫展現爆發力，被港隊守衛力逼都推入禁區射入，為曼聯拉開。上場鬥到互射12碼反勝，今場輕鬆得多，甘倫龍門口頂入，大演帽子戲法。又一次左路攻勢，積斯傳中，賈斯柏尾柱趕到，曼聯贏到5比0。

落後的港隊未有放棄，童祈樂左路推過守衛，禁區邊射遠柱追回一球，贏盡球迷掌聲。但未能贏得最後勝利，後場失誤，曼聯的莊姆受益，射成6比1。「小紅魔」再有精彩組織，法萊爾為曼聯「埋齋」，大勝7比1。