一線搜查｜非法勞工攻佔本港飲食業　中介主動上門推銷廉價外勞

香港失業率近期持續上升，飲食業更成為重災區，不少本地工人歸咎於輸入外勞計劃引入大量內地勞工，搶奪本地就業機會。走進餐廳，普通話員工幾乎「霸佔」前後場，有業界透露不少中介主動上門推銷廉價外勞，僱主為減輕成本，以「加大工作量」、「假招聘」、「壓低工資」逼走本地工人。勞工團體及求職者質疑計劃監管鬆散，呼籲政府堵塞漏洞。

飲食業本地工人失業潮　外勞「攻佔」職場

茶餐廳工作超過20年的阿俊（化名）感嘆行業式微，「香港飲食業已經好式微、已經好低落，仲要加埋啲外勞過嚟。間間餐廳，基本上你行入去，聽到好多普通話口音嘅員工。無論廳面、廚房，基本上香港已被佢哋全面霸佔。」他指出，許多本地工人面臨失業或開工不足，「你政府仲話要繼續，咁你只係幫咗老細嘅啫，幫唔到我哋。」

阿俊透露，部分中介公司主動上門，向餐廳老闆推銷廉價外勞，更提供內地勞工試工安排，試工數日後即可正式聘用。他曾與一名試工員工交談，對方坦言從深圳請假三天來港試工。阿俊批評，僱主成功聘請外勞後，常透過增加工作量逼走本地員工，「佢一路一路加強你嘅工作量，譬如有啲嘢唔係你做嘅，又會叫你做埋佢，你做唔做啊？唔做、頂唔順嘅，你咪走囉！譬如倒垃圾，以前唔使你倒嘅，𠵱家幫我倒咗佢。做唔倒啊？咁你唔好做呢份工。」

批輸入外勞計劃漏洞多　勞工處難查公司真實空缺情況

根據勞工處的補充勞工優化計劃，僱主須進行4星期本地招聘，優先聘用本地工人，勞工處亦會為空缺選配求職者。然而，大專生Norman分享求職經歷，揭露招聘亂象，指曾試過星期五下午6時去見工，惟對方聲稱「唔請人」。「但重點係，我嗰日係約咗6點見工，佢就同我講話冇喺勞工處落廣告，叫我攞招聘廣告同佢核對資料。核對之後，名係啱嘅、地點係啱嘅。戲肉係，我走咗5分鐘之後，我行咗去地鐵站，佢再打返電話俾我，問我係唔係勞工優化計劃、問我係唔係外勞。」

另一大專生Betty亦指，面試條件與廣告不符，「招聘話9小時工作，月薪14,690元，但實際要10小時以上，底薪僅11,700元加佣金，仲要港九新界走場。」勞工權益關注者程展緯表示，曾應徵9份工作，其中6份疑似無實際空缺，「就算向勞工處投訴，佢哋只問僱主，答覆係『講錯』或提醒僱主。」

他質疑勞工處沒辦法查看公司真實空缺情況，批評輸入外勞計劃漏洞多，未有措施確保職場環境及薪資待遇，變相壓低工資、惡化工作條件。「我相信有啲僱主真係需要人手，但而家政府俾咗咩呢？就係當你請唔到人時，第二步就係外勞，中間無其他方法調整到可以請到勞工。而且成個聘請外勞嘅計劃中，並冇優化到整個職場。相反，將職場薪金拉低、環境維持惡劣，將來嚟到香港嘅外勞亦因為交咗勞務費之後，喺一個好差嘅環境下工作。」

小紅書宣傳「香港打工簡單」　內地中介收費2.5萬至4萬人民幣

內地中介公司在小紅書積極推廣赴港工作，收費2.5萬至4萬元人民幣，涵蓋勞務、簽證及保險費用，工作亦以餐飲職位為主，由大廚、侍應生至清潔工，工資約1.5萬港元。中介聲稱成功率高，無需培訓即可赴港工作，8月更舉辦多場迎新會，每場吸引20至30人。惟部分內地人選擇繞過中介，直接到勞工處就業中心求職。在小紅書上亦充斥大量相關帖文，「你知道嗎？去香港工作其實沒有那麼難」、「去香港打工很簡單」。而《一線搜查》攝製隊亦在上水就業中心遇見多名講普通話人士求職，但對方不願多談。

駁斥張宇人說法涼薄　譚金蓮：朱門酒肉臭、路有凍死骨

港九勞工社團聯會副主席譚金蓮批評，補充勞工優化計劃自2023年9月實施，至今兩年，獲批外勞人數激增，遠超過去20年總和，形容情況「泛濫」。對於飲食界議員張宇人曾稱「多謝外勞提高食品及服務質素」，又說香港打工仔因為有外勞「其實開心咗」，她駁斥：「如果有啲人咁涼薄話睇唔到工友失業情況，仲話佢哋開心嘅話，咁我送佢一首詩：『朱門酒肉臭，路有凍死骨』。」

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞