抖音男女山頂報警 警員「奉召」落山坡執手機 惹網民怒轟：下次跌落海又點？
【有線新聞】社交媒體熱傳一段「報警執手機」影片，講普通話男女在太平山不慎將iPhone跌落山坡，於是報警求助，警員到場後冒險攀爬欄杆而下。雖然尋回手機，但警員亦直言不應報警處理，「我哋都打份工㗎咋，其實應該唔同你執㗎」，並向一直拍攝的男方戲言：「你返去你同我小紅書，你同我讚呢個阿Sir」。事主隨後將影片上傳至抖音，遭網民質疑濫用警力。
男子手機全程錄影 警：返去小紅書讚
該長約2分半鐘影片據報攝卡太平山頂步道，可見有警員在石堆中行走，又聽到有警員稱：「我哋應該唔同你執㗎，警察都係人，阿叔都講得啱，唔會搵條命同你博，啱唔啱呀？我哋都打份工㗎，其實應該唔同你執」，「你自己唔小心，係咪先？大風跌咗電話你都要自己去睇下點樣搞，唔係搵警察嘛，係咪呀？」，「人哋阿叔就明白，搵條命同你搏呀？當份差，我哋打份工㗎咋，你記住」。
在尋找手機過程中，有警員要求女事主拿出證件登記個人資料時，並以普通話表示：「那麼年輕，你也不走下去，要我們老頭子走下去，還有你看到我們嗎？我們（裝備）很重的」。影片其後可見到警員成功尋回手機，遞回給掉手機的女子。同行男子則以手機全程錄影，有警員稱「唔好影啦，先生，跌咗落去我哋唔會同你執。唉……」，另有警員則說「你影唔緊要，影完你同我讚佢，你返去同我小紅書，同我讚呢個阿Sir（撿手機警員）」。
網民憂開壞先例 促轉介消防收費
「下次出海跌左電話落海，係咪可以叫水警幫我執？」、「開左個頭，咁即人人都得」，網民紛紛批評事主浪費警力，「叫消防，特別服務收費$3,000起跳（非人命）！」，有認為「仲叫人up小紅書，真係自找麻煩了。以後大把人有咩事就報警，叫免費執野了。」未知是否見影片引起爭議，上傳者其後在抖音上刪除原片。
