一線搜查｜土瓜灣後巷淪「露天公廁」　離公廁僅5分鐘路程　店主裝天眼揭另一驚人畫面

土瓜灣一條狹窄後巷淪為「露天公廁」，不時有人無視衛生及公德，在巷內隨處便溺，甚至光天化日下照做不誤。附近商戶不勝其擾，有人自行安裝閉路電視，意外拍下令人瞠目結舌的畫面，不僅有男有女在巷內大小便，更有清潔工人將垃圾直接掃入雨水渠「收藏」，令後巷臭氣沖天、蚊蟲滋生。

一出後門見屎尿　店主裝閉路電視「追兇」

涉事後巷由北帝街直通馬頭圍道，巷尾屬死胡同，有缺德人士以為地方隱蔽，竟肆無忌憚地當作「公廁」使用。附近多間商戶的後門正正面向該巷，有店主每日開門都「有驚喜」。

店主陳先生指，「每次經店鋪後門出去就見到有屎、有尿。我之前冇裝閉路電視，但（發生次數）太多啦。」陳先生無奈下自行安裝閉路電視，幾乎每日都有「新發現」。「今朝（訪問當日）有個女人大便，嗰度一堆屎，就係咁囉。另一條巷就成日有人痾尿，唔理有冇人經過，有啲女士行過都唔知幾尷尬。」

距離公廁僅5分鐘路程　商戶無奈受牽連

雖然後巷內已經張貼不少閉路電視截圖，惟效果不大，他們不單半夜在後巷大小便，甚至光天化日下亦照做不誤，無視途人路過。記者翻查地圖更發現，該後巷距離最近的24小時公廁僅約5分鐘路程，巷內亦有兩間商戶的員工廁所，平日雖上鎖，但有需要可向店員借鎖匙。

另一個商舖負責人Dennis表示，大便約一個月遇三、四次，小便則幾乎隔日發生，「真係好誇張，我估唔到，係一大坨咁樣，噴到啲牆都係，好誇張。」他透露，有時同事撞見會即時喝止，每次都要開水喉沖走污穢物。

閉路電視揭清潔工掃垃圾入渠　店主：我全部有錄影紀錄

更離譜的是，閉路電視還拍到清潔工人將巷內垃圾直接掃入雨水渠「收藏」。陳先生說：「佢（清潔工人）將垃圾全部掃入坑渠收藏，做得好啊，我讚佢啊！將啲垃圾掃埋去收埋就唔使拎走，你普通人一睇冇垃圾，好乾淨。」陳先生指，之前一直覺得奇怪為何後巷渠口經常堵塞，自從有閉路電視後才明白一切。「呢度雨水渠堆滿垃圾，臭氣熏天，又有蟲游嚟游去。有承辦商嚟通過，但通咗等於無通，嚟影咗相交功課，我全部都有錄影紀錄。」

就後巷衛生問題，陳先生曾多次致電1823投訴，他指出洗街車經常清洗北帝街，但完全不入後巷，「我問佢哋點解唔洗後巷，佢話無政府指令。」而拍攝當日，《一線搜查》攝製隊遇到清潔工人洗街，有清潔工人就指，後巷本屬其責任範圍，但要經公司安排人手處理，過往約一周進行一次清潔，但坦言現在很少。

而在《一線搜查》向食環署查詢後，陳先生突然「報喜」，指經投訴後，當局連續兩晚都有派員清洗後巷。食環署則回覆稱，已按既定機制及「風險管理」的原則，在涉事後巷進行巡查及突擊檢查，並未發現有清潔工人違規將垃圾掃進坑渠情況，而涉事後巷亦沒有種植樹木，不存在將樹葉掃進渠內情況。然而，如發現承辦商工作表現未符合規定，署方會採取相應懲罰措施，包括向承辦商發出口頭警告、書面警告及失責通知書並扣減服務月費。

食環署又提到，今年至今未接獲涉事後巷有關便溺投訴，巡查時亦未發現排泄物，但向亂拋垃圾、違反潔淨的人士發出共四張定額罰款通知書。而今年至今，署方在有關地點附近一帶向亂拋垃圾、隨地吐痰而違反相關潔淨法例的人士發出共27張定額罰款通知書。

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞