澳網｜艾卡拉斯反勝祖高域封王　22歲集齊四大滿貫錦標

【有線新聞】澳洲網球公開賽，艾卡拉斯盤數3比1反勝祖高域奪得男單冠軍，成為最年輕球員集齊四大滿貫錦標。

世代之爭，淺綠衫的艾卡拉斯2005年只得歲半時，祖高域就首次捧走大滿貫，底線滑行救球、上網、後場，兩人滿場飛，剛開賽夠腳力還是祖高域佔優。艾卡拉斯落後到2比5，仍想取直線太冒險，祖高域首盤贏6比2。

22歲對38歲，艾卡拉斯首次入澳網決賽就鬥「澳網之王」，決賽10場全勝的祖高域輸經驗、贏活力，做出今場首次破發，第二盤拉開3比1，成為爭標戰轉捩點。兩人均於四強打足5盤，拳怕少壯，艾卡拉斯連打幾板超大角度，令祖高域追到氣咳，已經從網側抽落底線，艾卡拉斯又趕到，贏多盤6比3，拿度都佩服。

進入第四盤，祖高域首個發球局，一連救6個破發分都未夠，跟生涯25個大滿貫冠軍再一次擦身而過。互保發球到第12局，祖高域打失，艾卡拉斯再贏7比5，盤數3比1。法網、溫網、美網之前已經各贏2次，今場澳網冠軍到手，22歲之齡超越拿度，公開賽年代最快達成「全滿貫」成就。