一線搜查｜內地爆紅「食功課」零食　劣質料恐礙腦發育　女生：試過類似好好食　

小時候讀書「唔入腦」，都會幻想可以將成書本「食落肚」徹底吸收，內地最近就興起名為「可食用作業」、「可食用課本」的新奇零食，在糯米紙印上精美圖案文字，不過「食落肚」的恐怕不是知識，隨時是一堆不知明添加劑。

據了解，該糖果零食是將食用色素同添加劑混合後，用印刷方式將內容印在糯米紙上。糯米紙本身由澱粉製成，理論上可以食用，而商家就以「解壓」、「新奇體驗」作為賣點，令這款零食迅速掀起熱潮。

《一線搜查》隨機街訪幾位小學生，大多都相當有興趣。一線搜查：「你哋見到會唔會都想試下？」學生A：「一張紙。可以啊。」一線搜查「：有冇話咩原因想試下？」學生B：「好有趣囉。睇落去，想試下。」學生C：「我試過第二啲呢啲咯，就咁白色，一張張嘅可以食嘅。」一線搜查：「你覺得個味道點樣啊？」學生C：「好好味。」

不過，內地市場監管部門提醒，部分可食用課本存在色素及添加劑超標、印刷工藝不合規格等問題。

THEi高科院食品及健康科學系講師吳詩穎指出，正規可食用油墨主要由食品級色素、食用級溶劑同天然樹脂等物質組成，部分劣質產品為減低成本，可能會用非食品級，甚至工業級油墨，又或者非食品級色素，好大機會含有重金屬，例如鉛、鋅、銅等，仲可能出現甲醇、苯類溶劑（例如甲苯）等有害成分。

吳詩穎指市面其實有不少客製化「印圖案」食品，例如生日蛋糕「生日快樂」字牌，但單憑肉眼無法判斷食用是否安全，必須依靠專業分析儀器才能準確檢測，但就算是食品級色素，用量都必須合規。吳詩穎表明應選擇正規廠家生產、標籤清晰、有食品安全認證嘅產品，如果包裝未清楚列明成分，又或沒有食品生產許可編號，就應該避免購買。

家庭醫生林永和則強調兒童肝腎功能尚未完全發育，對化學物質耐受性遠低於成人，如果長期攝入超標添加劑或重金屬，可能會對肝腎、神經系統造成不可逆轉損害。特別是鉛等重金屬，長期大量攝入會影響中樞神經系統，可能拖慢腦部發育、影響專注力及智商，甚至干擾荷爾蒙，導致生殖系統失調。由於小朋友代謝吸收相對較快，同樣份量害物質造成傷害會比大人更嚴重，少少劑量都可能帶來長久影響。

HOY 78：《一線搜查》
播出日期：逢周一至五
播出時間：晚上8時HOY 77首播、8時半HOY 78重播
WhatsApp報料熱線：68960931
節目重溫請＜按此＞