一線搜查｜冇充電、冇插線照自爆　用一年「尿袋」火燒車廂　港品牌急停售送檢

有線新聞
2026年10月15日

電視台經常出外景拍攝，手提電話好易冇電，長備「尿袋」（行動電源）只是基本配置，但本台新聞部一名攝影師日卻遇上無妄之災，非使用中的「尿袋」突然在車內爆炸，猛烈火勢導致他二級燒傷。據了解，肇事「尿袋」只用了一年多，當時亦是「閒置」狀態，《一線搜查》就請來中大物理系首席講師湯兆昇博士，拆解可能原因。

「突然之間，我褲袋嗰位突然起火，嗰下嘭一聲，成條褲都著火。」事主憶述當時坐在車內，突然褲袋位置「嘭」一聲起火，火勢更一度燒到頭髮。他最初還以為是汽車着火，第一時間完全「反應唔到」，而旁邊司機同事亦「呆咗幾秒」才發現事態嚴重，即刻拉他落車。

「如果我feel到有熱嘅話，正常會即刻攞出嚟，但嗰下完全冇任何先兆，一下就嘭一聲，火去到我頭髮。」事主強調事發前尿袋完全冇發熱、冇發脹，亦無任何異樣。由於事出突然，他當時只能夠本能反應，嘗試用手拍熄。

事後經醫生診斷為二級燒傷，燒傷面積約7至10%，主要位置包括手臂、手掌、後腰同左大腿。事主：「如果冇食止痛藥嘅話，會feel到好似有一種……因為我而家成塊皮甩咗啦嘛，可能係接觸到空氣啊，其實都已經有一種疼痛嘅感覺啦，同埋有啲時候會有間接性，好似系咁俾針拮，即好多支針一齊拮，插落你度咁樣嘅感覺。」而由於傷口較深，需要會接受手術治療。

據了解，出事尿袋並非雜牌貨，而是香港品牌產品，已使用約一年半，並具備齊全的3C認證。事主本身對電子產品安全有一定認識，自問已做足安全考慮，但今次事故發生相當震驚，「明明冇用到個尿袋，都發生意外」。他事後坦言有輕微PTSD症狀，希望廠商可以檢查相關批次產品，避免其他用家受影響。

據湯兆昇博士解釋，尿袋起火或爆炸原因可以有多種，最常見係內部短路，令正負極「黐埋咗一齊」，瞬間產生大電流同高溫，觸發化學反應並釋放氣體，最終導致燃燒或爆炸。短路成因包括正負極隔離膜受損，例如電池曾經跌過或受大力擠壓；或者電池因長期過充、過放、老化而產生鋰結晶，損毀隔離膜。

「一般嚟講咧，尿袋譬如用三幾年都可以。就算個質素唔係好好，其實都幾百次插電同放電都應該系冇問題嘅。」湯博士提醒購買時應選擇有安全認證嘅產品，避免來源不明或無牌子貨，一般優質尿袋可循環充放電800至1000次；使用時亦應注意保養，避免放喺過熱或猛烈陽光下、不要過充或過放，電量最好保持在20%至80%之間，並且避免處於極低電量狀態下長時間閒置。