一線搜查｜購入啟德連租約單位　新業主遭拒認身份　租客欠租兩月兼貼告示反擊：你唔係真業主

啟德一個樓齡未滿五年的屋苑，近日爆出租霸事件。《一線搜查》早前接獲觀眾Apple（化名）求助，指早前購入連租約單位，計劃於租約完結後自住，怎料租客拒絕承認其新業主身份，更以「業主失聯」為由，連續兩個月拒交租金。新業主無計可施下企圖上門交涉，惟對方拒絕應門，甚至報警處理。

拒認新業主身份　租客：你唔係真業主、你哋唔係真agent

Apple於今年3月14日購入該啟德屋苑一個400多呎的單位，當時單位已連租約，租客為一名60多歲的退休公務員，地產代理指其過往交租紀錄良好。根據租約，單位每月租金約18,500元，租約為「一年生約、一年死約」，至2025年8月死約到期。Apple計劃於租約結束後收回單位自住。惟成交後，租客卻拒絕承認Apple的業主身份，聲稱無人通知單位轉手，並連續兩個月未有交租。

「佢話業主失聯，交唔到租，再打俾律師問我哋身份。由頭到尾佢都否認我哋業主身份，我都唔知我哋可以做咩。」Apple透露，租客曾於4月與其丈夫在雙方地產代理安排下會面，當時勉強繳交4月租金，但會面過程氣氛不愉快，租客聲稱前業主未有通知賣樓事宜，又質疑丈夫及地產代理身份，會上叫嚷：「你唔係真業主、你哋唔係真agent！」

上門交涉無果　租客貼告示反擊

為解決爭議，Apple聯同《一線搜查》攝製隊於近日上門交涉，卻發現單位大門貼有兩張告示，分别於2025年5月20日及5月30日張貼，寫有「尋，業主失聯，交唔到租」及「請勿刑事毀壞財物、業主煩請聯絡」。記者表明身份，試圖了解租客是否因經濟困難無法交租，單位內雖有聲響，但租客拒絕開門。攝製隊離開後，屋苑管理處通知Apple，稱租客報警處理，惟警方到場後又表示「冇事」。

奇就奇在，租客雖然不承認其新業主身份，但向兩人提出多項無理要求，包括要求Apple簽署一份手寫文件，要求無條件接受屋內所有損耗。Apple：「佢話間屋有損耗，前業主應承咗佢話唔整（執修）都得，到時我會認返。」Apple曾要求上樓檢查單位損耗情況，然而租客以私隱為由拒絕，甚至反諷：「你以後買樓，買間有得睇樓嘅先好買。」Apple無奈下要求對方拍攝屋內環境，對方卻聲稱手機壞了，隨後斷絕聯繫。

新業主無奈：根本冇嘢可以懲治佢

為討回公道，Apple已入稟土地審裁處申請欠租收樓，並將相關文件張貼於單位大門及放入信箱，惟全被租客撕毀。租客更於6月10日提交手寫反對書，聲稱於4月會面時遭Apple一方「出言侮辱及人生攻擊」，並重申不承認其業主身份，稱「舊業主已核實身份，我每期交租有早無遲」，甚至指自己「超越租客身份」，積極「尋找真業主」，認為自己「有被老屈之嫌」。

Apple大感無奈：「其實我而家最擔心間屋唔知搞成點，我但求盡快收咗間屋啫，只要佢肯搬走，我按金畀返佢都冇所謂。我底線已經係去到冇底線，但問題係我溝通都溝通唔到，搵都搵唔到。」她透露，自己現時租屋居住，原本計劃8月租約完結後搬入單位，但事件發展複雜，恐拖延收樓進度。她更需自行支付單位管理費及按揭，壓力沉重：「我而家又要幫佢畀埋份租，我都要還錢㗎嘛，又要畀管理費，我自己嗰邊又交緊租。但點解佢仲可以自由出入？仲可以去土審玩反對，根本冇嘢可以懲治佢。」

專家建議：欠租15日即可追租

香港業主會會長余慶雲指出，根據法例，租客欠租超過15日，業主即可入稟土地審裁處追租及收樓，無需等待數月。他表示：「好多業主唔知有呢個條例，唔使等幾個月，欠租15日後已經可以告佢，第16日已經可以入稟法院告個租客。個租客玩緊似是而非嘅遊戲，佢會搵好多唔同理由，最終目的得一個，就係唔交租。」他建議業主盡快入稟土地審裁處，「土地審裁處只係審兩樣嘢，喺租務上，欠租一定判業主收到樓，法官只睇正確文件，唔睇其他任何嘢，時間仲快過去區域法院或小額錢債審裁處。」余慶雲亦提醒，按金不能用於抵扣租金，業主應盡快採取法律行動。