一線搜查｜模型預售一年未發貨 苦主追討遭一拖再拖 店主：因為佢搞事
為買心頭好可以等幾耐？不少模型迷遇上心儀產品，就算要預訂等上半年都甘之如飴，但最近有消費者向《一線搜查》投訴，指一間位於旺角的實體玩具精品店涉嫌拖延出貨、拒絕退款，更以各種理由推搪，事件仲引發「非法禁錮」風波，警方、海關先後介入調查。
「呢間店鋪標示價格比坊間平兩成至三成，咁我覺得都幾吸引啦。」苦主陳先生上年六月首次光顧涉事店舖，當時購買兩個產品值約一千元，店方順利交貨。同年七月及十一月，他再透過店舖預訂四隻模型，全數付款總額達7,680元。七月訂單預計今年一月底到貨，十一月訂單則預計五月底到貨，詎料貨期自此「一拖再拖」，去到今年二月仍然音訊全無。
「態度都OK嘅初時嘅時候，佢就話要去點算，有唔同嘅理由，要去睇下司機發咗貨未啦，要睇下倉有冇，基本上每個禮拜問一次，佢都會去話畀我聽跟進緊嘅。」兩個月過去依然沒貨，陳生開始失去信心，決定先要求退回約3,600元，被拒絕後建議「以貨換貨」。陳生今年四月親身上旺角店舖揀選兩個價值2,479元嘅模型，店方亦承諾安排退還餘額。
不過，店方之後態度急轉直下，不斷以「一個禮拜推一個禮拜」方式拖延，「之前呢啲就係話喺門市要現金退款搞事嘅客人，我哋會一概不退款，直接交由法庭退回」、「鋪頭分咗唔同部門，玩具部嘅戶口暫時停止而無法退款」、「現在唔會同你爭拗，任何嘢直接到法庭講」。
陳生另有兩件貨品應在上月底到貨，結果一樣石沉大海，連同已付未收貨款，店方共欠約5,200 元。《一線搜查》上月底就陪同陳生再次上門，店員卻匿藏在屏風後面，拒絕現身，並第一時間報警。陳生追問負責人資料同退款安排，對方則不斷重複「有傳媒就唔會退」、「要法庭見」等說法。溝通僅維持約五分鐘，警方就到場處理。
「個核心說法，就係話如果個顧客唔合作，佢係唔會退款嘅。聽佢指示，佢先至會退款。」陳生認為有真金白銀付錢訂貨，交不到貨退錢絕對是理所當然，不能夠用其他籍口一直拖延。而在模型玩具相關群組內，亦有多位網民留言投訴：「網上叫佢退錢就左推右推」、「打開門做生意，收晒錢，畀唔到貨，仲報警趕客」等。
《一線搜查》事後找到店主了解，對方承認近幾個月資金周轉困難，又自稱做生意被人陷害，遇上惡性競爭，又有有客人「搞事」報詐騙累其戶口凍結，過往有客人威脅淋滾水、恐嚇強姦，甚至上門偷貨搶貨，更曾上門「非法禁錮」店員，導致職員受傷，「我明白好多客人都講話唔關我事、我冇害你、我冇攪過你，但係你明白，有人搞咗我之後，我就影響到你。」強調如果銀行解凍會按次序退款，又建議客人不相信的話，可以去法庭處理。至於陳先生的款項，明言要經小額仲裁才會退，「係揀（選擇性退款）㗎，因為佢搞事吖嘛。」
警方回覆《一線搜查》表示經初步調查後，以涉嫌詐騙拘捕一名41歲男子，被捕人已獲准保釋；另於5月22日接獲刑事恐嚇報案，以涉嫌刑事恐嚇拘捕一名55歲本地男子。海關亦表示已接獲相關舉報，若發現違反條例，會採取適當執法行動。陳先生其後聯絡《一線搜查》，指事件曝光後，店方已直接退還欠款。
HOY 78：《一線搜查》
播出日期：逢周一至五
播出時間：晚上8時HOY 77首播、8時半HOY 78重播
WhatsApp報料熱線：68960931
節目重溫請＜按此＞
