一線搜查｜大埔老翁撞壞玻璃門　承諾維修事後走數　店家無奈：好失望

一場原本出於善意的借廁所便利，卻因意外演變成賠償糾紛。大埔一間餐廳的負責人黃小姐向《一線搜查》報料，指日前有長者借用洗手間時不慎撞壞玻璃門，導致門鎖失靈、電力中斷，影響顧客出入。該名老翁及其兒子口頭承諾安排維修，惟事後失聯，黃小姐多次聯繫無果，警方亦表示無責任跟進，無奈之下自費約3,000元維修。黃小姐感嘆「無妄之災」，坦言感到失望，決定不再借出洗手間。

老翁借廁所撞壞餐廳玻璃門　警方協調下承諾維修

事發在8月30日晚上約8時許，一名老翁到大埔一間餐廳借用洗手間時不慎撞向玻璃門，導致門框移位、電力系統故障，無法自動開關。黃小姐憶述：「我一邊收緊錢，阿伯就撞到門，『嘭』一聲，好似啲電著咗火咁。我望一下阿伯，以為佢嚟幫襯，跟住佢入嚟之後係咁行，行咗入去廁所。」

黃小姐指，當時自己未察覺門已損壞，以為無大礙，繼續營業。未幾，她發現玻璃門故障，顧客需手動拉開，影響餐廳運作，「啲客人要開門，覺得麻煩，有啲公公婆婆入唔到嚟，我哋都要手動同佢開門。」黃小姐隨後就事件報警，老翁的兒子亦趕至現場，雙方在警方見證下商討賠償事宜。黃小姐諮詢維修師傅，估計維修費用約3,000元以內，並向老翁兒子提出按實際費用結算，強調「好公道」。未料對方質疑費用，又稱「使唔使3千蚊呀」，最終承諾自行安排師傅於星期一完成維修。

承諾成空　店家無奈自費維修　黃小姐：好失望

由於警方在場調停，黃小姐對對方承諾深信不疑，未有要求簽署書面協議或收取按金。「我冇要求佢交按金，因為我信有差人喺度，我信佢係香港人會履行自己責任。差人又冇叫我哋簽和解紙，我唔識做呢樣嘢。我相信警察喺度，佢唔會唔認帳。」

然而，事件未如預期解決。事隔一周，黃小姐多次致電長者父子無人接聽，通訊軟件亦無回覆。她再次報警求助，警方卻表示無責任跟進，並稱「如果你打去搵唔到，我打去佢都未必聽」。黃小姐：「我話當時你哋警方做中間人，要我哋和解，你係中間人，幫我問吓點樣，嚟唔嚟整都要俾個交代！佢話冇呢個責任。我無嘢講啦，好失望。」

直至星期二，對方雖回覆通訊軟件，但無正面回應維修事宜，黃小姐最終只能自費聘請師傅維修。她無奈道：「如果係自己啲客整壞咗，咁冇辦法。呢個係無妄之災，仲要唔履行自己責任，我覺得好失望，影響到我生意，啲客出入好麻煩。以後都唔借廁所，真係唔借。」

警方：事件列「糾紛」　不涉刑事成分

警方回應《一線搜查》時表示，警方於8月30日晚上約8時26分接獲大埔一間餐廳職員報案，指與一名男子因進入餐廳借用洗手間時，意外損毀物品而發生爭執。人員接報到場，經初步調查，事件不涉及刑事成分，該名男子表示會為餐廳安排相應維修，報案人亦同意有關安排，案件列作「糾紛」。警方強調，對每宗個案均會按實際情況及既定程序，以認真、專業態度處理。

執業律師梁永鏗就指出，雙方應在警員調停時記錄對方姓名及地址，若對方承諾賠償後反悔，餐廳可向小額錢債審裁處提告，追討少於7.5萬元的賠償。惟賠償金額可能按玻璃門折舊價計算，未必涵蓋全新門的費用。

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞