一線搜查｜前護士踢爆護養院黑幕　長者肢體扭曲、傷口腐爛無人理　衛生署：無接獲投訴

香港護養院質素參差不齊，《一線搜查》接獲前註冊護士爆料，揭發有院舍涉嫌虐老，多名院友肢體扭曲、傷口潰爛無人理會、長期遭捆綁，甚至抽胃液程序長期造假。她投訴業界除人手不足外，外勞培訓不足、監管亦形同虛設，促加強家屬監察。

八旬翁目睹妻被虐　怒斬護養院職員判囚16個月

一名80多歲老翁早前在護養院目睹妻子遭職員粗暴對待，多次投訴無改善，反變本加厲，甚至當面虐妻。老翁憤怒難平，為妻報復，斬傷護養院職員，最終於上周被法院判囚16個月，事件引發公眾關注長者照顧危機。《一線搜查》接獲前註冊護士Ryles爆料，指曾在某護養院工作3年，目睹院友肢體扭曲、傷口潰爛、被人長期捆綁導致受傷等慘況。

「屎、尿、屁，或者一啲體液，血、痰、膿，人嘅腐爛組織、好核突嘅傷口，其實呢啲嘢根本唔係最厭惡。」Ryles表示，三年來最令她崩潰的，是院內冷漠氛圍，令她每日情緒極度不安，最終決定拍攝證據並辭職。

院友肢體對摺屈曲　護理員無視潰爛傷口

她指出，涉事護養院一層樓有約70至80名院友，當中至少8人出現肢體嚴重扭曲，部分人下半身對摺屈曲，眼窩亦深陷。Ryles質疑：「佢嗰個扭曲嘅情況其實係持續幾耐，先會令一個人可以攣到咁樣。」而傷口護理更荒謬，一位院友小腿如「生蛇皮」，膝蓋至腳踝黑點斑駁，黃色滲液更染污床單。Ryles：「睇返藥薄，有咩藥呢？我預想會有皮膚科嘅藥，點知得潤膚膏，兩隻潤膚膏。對於嚴重嘅皮膚病嚟講，其實冇意思。我返去同返同事講要跟進，同事好直接咁話唔使㗎啦。」

除此之外，護養院的約束問題嚴重，有院友手腳被緊綁，繩結不留手指寬度，涉嫌違反準則。Ryles批評政策形同虛設，有院友受傷後仍被綁起手腳，其中右手被綁緊後再以高枕墊起，無法動彈，「佢被人咁綁住，會諗：『我究竟犯咗咩錯，點解入到護老院，我成為一個犯呢。』」而院友太太亦無奈向她反映，指丈手被緊綁雙手，但由於護理員態度兇惡，未敢輕易解開丈夫，「而護理員企喺我面前，好大聲、好理直氣壯、亦都好唔客氣咁同太太講，『佢一定要綁緊嘅！』」

Ryles：「定咗好多制度，好多文件，佢哋需要巡視、去簽署，嗰啲監管機構亦會去睇返佢哋有冇簽文件。但係可以講嘅係，其實佢哋只係睇有冇人簽名，但佢有冇睇到係咪適切去施用呢啲約束物？其實係冇嘅。」

抽胃液程序造假　存肺炎隱患

插胃喉程序更危險，根據程序需要紀錄抽取胃液的酸鹼度等，然而護理員過去三年來一直造假，抽取胃液確認位置永遠寫「零」。「由年頭至年尾，由朝至晚，由前年、上年、今年都一樣，所有院友抽出嘅胃液都係「0」。其實黃金標準係抽胃液去確認胃喉嘅位置，佢哋（護理人員）首先攞嘅唔係試紙，而係聽筒，完全無視咗試紙，全部人都係以聽筒嚟聽聲。」Ryles解釋，若未有做足插喉程序有機會引發事故，包括因「胃喉」灌食而引發肺炎等。

「護理界別裡面嘅人手問題係需要正視，但係咪單純人手問題？你只要將人手填滿，咁就解決咗？」Ryles認為，問題不能只歸究人手不足，部分原因是護理人員質素參差，而行業的監管亦不足，認為應該引入家屬監察組織，「任何時間，當家屬自行喺院舍裡面發現一啲問題，跟住唔使透過院舍，可以通過社署或者再高一級，如立法會等等，去共同處理。」

衛生署：過去三年未接獲投訴　正跟進事件

政府在2023年6月起推出院舍輸入護理員特別計劃，容許所有安老院、殘疾人士院舍及護養院輸入外地護理員。截至今年3月底，全港共有13,211名護理員在安老院工作，當中超過7,000人是本地護理員。而輸入的護理員人數也超過6,100人，人手比例近一半。

「輸入外勞ok，冇問題，但你要去監管，輸入時你要有教育。譬如我培訓時，你要我幾多年培訓，咁外勞培訓又係幾多年？其實無乜咋喎，你求其湊合人數就ok啦喎。」Ryles認為不論是外勞或本地護理人員，人手及培訓不足都是行業的致命傷。面對一些無心照顧長者的護理人員，Ryles直斥：「我剩係想同佢講，你不如唔好做啦！護理，我唔要求你係南丁格爾，但係你都做返個人呀，你而家連人格都冇呀！你搞到啲老人家晚年都過唔到世。」

衛生署回覆《一線搜查》查詢時指，過去三年沒有接獲相關投訴，署方亦有定期巡查該護養院，過去三年沒有發現涉事護養院有關傷口護理或約束致傷的違規情況。因應查詢，署方現正跟進事件，如發現有違規情況，會採取規管行動。

至於涉事護養院在截稿前未有回覆。

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞