一線搜查｜近18年歷史錦上路跳蚤市場1月底結業　營運商嘆由一舖難求變百檔空置　檔主含淚不捨街坊情

開業近18年的錦上路跳蚤市場將於1月底結業，這個只在周六、日營業的懷舊市集，曾吸引大量市民前來尋寶、消遣，檔位長期爆滿，一舖難求。如今僅剩約60檔營運，不少檔主與街坊均感不捨，稱這裡已承載無數人情味與回憶。營運商陳義漢則稱以平常心面對，坦言「時代洪流，係時候退落嚟」。

錦上路跳蚤市場自2008年5月1日開業以來，已陪伴港人近18年，每逢假期就吸引無數男女老幼前來閒逛、尋寶。然而，隨著北環線工程的落實，這片土地被納入工程範圍，市場亦將於本月底正式結業。

近18年歷史懷舊市集　曾一舖難求

市場以售賣懷舊產品為主，大大小小的攤位販賣黑膠唱片、玩具、懷舊小吃等，彷彿讓人穿越回舊時代的香港。跳蚤市場營運商陳義漢回憶起當初的點滴，語氣中滿是感慨。他經營跳蚤市場已有30多年，曾參與過錦繡和石崗等跳蚤市場，全盛時期更曾帶領數百檔攤販。但錦上路這個市場，是他堅持最久的一個。「我諗全香港最耐就係呢個市場。我未做過一個場做咁多年，我最耐一個場都係七、八年，呢個已經係我最後一個場。」

這塊土地原本屬於港鐵，早在2003年錦上路站啟用時，周邊還是一片寧靜荒涼，缺乏人氣。港鐵邀請陳義漢前來開辦市集，希望藉此帶旺地區。經過五年申請手續，市場終於在2008年開幕。「當時東鐵和地鐵未合併，佢哋俾咗幾塊地我哋揀嚟做，我就揀咗呢塊地。」陳義漢憶述，「當時呢度係一個好寧靜、好荒涼嘅地方，到我哋越做越好，加上地鐵貫通尖沙咀，呢度曾經旺過成十年。」他坦言非常令人懷念，「以前呢度好擠擁，很有特色。如果係星期日下午5點，呢度逼滿晒人㗎。」

這裡不需入場費，成為許多家庭的親子樂園。陳義漢：「香港人唔係個個都要去啲畀入場費嘅地方，佢嚟到呢度，啲小朋友玩機，媽媽畀十蚊、二十蚊，佢已經可以玩半個鐘㗎啦，（呢種地方）好難㗎。」

市場曾有160個檔位，在全盛時期一舖難求，需要等候4至5年才能租到。但近年來，人流減少，今年更出現大量空位。「我哋以前係一舖難求，你無等4、5年都租唔到。今年就冇辦法，今年真係大把位做，而家我哋160檔，起碼有100個空位。」陳義漢解釋，租金低廉是吸引檔主的重要原因，從最初的每月2,000元，只加過一次至2,200元，特別適合退休人士或兼職經營。

檔主百感交集：有精神寄托、又可以做生意

如今，面對結業，不少檔主百感交集。賣玩具的檔主譚先生坦言，這裡不僅是生意，更是興趣與社交的天地。「自己鍾意玩玩具咪賣玩具，屋企擺滿玩具冇位放，咪租個舖，有個地方可以擺，又可以賺少少錢，又可以消磨下時間。幾好玩，識到好多朋友，呢度又平租，一個月2,000蚊，可以負擔。」他感慨，外面商場租金高達七、八千元，難以負擔。目前，他仍在尋找新地方安置貨物，「好徬徨，仲有咁多貨，唔知可以點。」

另一位檔主陳先生則視市場為精神寄托。「全香港冇呢種場，星期一至五都休息，最啱我哋呢啲退休人士，又可以有精神寄托，又可以做生意，一舉兩得。」對於剩餘貨尾，他決定全部捐贈老人院，「因為好多長者都鍾意玩呢啲手工藝。我仲有好多材料剩，佢哋就可以玩。」問及是否真的能放手，他笑言：「係放低晒㗎。（咁灑脫？）係㗎！」

告別舊時光　營運商陳義漢：平常心面對「時代洪流」

賣小食和自家製醃菜的霞姐在這裡經營了17年，與其他檔主和客人建立深厚感情，她曾一度退休，但為了一班熟客又復出。「我係附近住，當娛樂、打發下時間。呢度檔主又熟、客又熟。」提到結業，她含淚道：「因為好多人搵我買呢啲小食，成日叫我唔好唔做，唔捨得、唔捨得呢度啲人，個個都好好㗎。呢度啲人唔係話一定為咗搵錢，唔搵錢，係當呢度係娛樂，呢度啲人好開心。」甚至有96歲的檔主表示，會與陳義漢一起留到最後一刻。

得知結業消息後，不少市民亦專程前來，跳蚤市場亦重現久違的人潮。街坊葉小姐說，這裡以前是一個普通的地方，但因為有了跳蚤市場，人流暢旺了不少，覺得有點不捨得、亦有點失落。市民林小姐則讚揚這裡的親切氛圍：「因為有嘢玩、有嘢行。（覺得同出面商場有咩唔同？）好唔同，（呢度）啲老闆好好人，會同你講嘢吹水。」戴小姐補充：「舖同舖之間檔主關係好好，覺得呢啲都幾難得。因為平時去商場，舖頭都係隔住隔住，覺得（跳蚤市場）就咁完咗都有啲可惜。」

進入最後倒數階段，陳義漢說以平常心看待這一切，「我諗都係時候退落嚟，呢個係時代嘅洪流」。

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞