一線搜查｜瑜伽中心陷財困 負責人現身認欠債逾千萬 批少數導師追討欠薪扼殺轉型機會
香港一間擁有23年歷史的知名瑜伽中心疑陷嚴重財務危機，《一線搜查》早前報道，該中心不僅拖欠導師薪金、學員難以預約課堂，更因欠租問題導致多間分店相繼關閉。事件曝光後，中心負責人Dickson一直迴避傳媒訪問，然而近日竟主動聯繫《一線搜查》，坦承負債高達逾千萬港元，並首度公開解釋事件始末，聲稱自己「一肚委屈」、不吐不快，又將問題歸咎於社會環境，強調絕不輕易結業。
認指控屬實 負責人：我哋表面上係冇良僱主
Dickson在訪問中承認，瑜伽中心正面臨嚴重財務困境，負債金額遠超早前報道所指的500萬港元。「你哋報道講得好啱，但唔止咁少，我哋唔止欠緊500萬，係欠緊過千萬都有！」他坦言，導師及學員的指控均屬事實，包括拖欠60位導師薪金、近千名學員的課堂無法兌現，以及多間分店因欠租而關閉。然而，他強調問題背後有更深層的社會因素，「佢哋（導師及學員）講嘅嘢，表面係事實嚟嘅，我都冇乜嘢可以話佢哋唔啱，但裡面有好多社會問題。呢件事係一個孽嚟㗎，我要承受。因為咁多負面新聞指控我哋咁咁咁，因為我哋喺表面上、表面上係冇良僱主，但內裡冇人知我哋嘅來龍去脈㗎嘛。」
對於早前報道中，Dickson被指躲藏店內、拒絕接受訪問的行為，他解釋當時想接受訪問，但被其他導師及徒弟勸阻，「當時我好想出嚟講㗎，因為我想澄清，裡面有好多委屈，我都想講，但冇辦法啦，要忍辱負重先，要忍住。」
負債逾千萬 負責人：社會問題所致
Dickson將財務危機的根源歸咎於2019年的社會運動及隨後的疫情影響。「2019年開始，我哋由示威運動時生意開始好差，慢慢做到疫情，疫情我哋停業停咗9個月，嗰個時候就變咗有好大個窿出嚟啦，係一個債務。」他透露，尖沙咀、佐敦及觀塘分店目前仍處於欠租狀態，但幸得業主寬容，暫未採取法律行動。
Dickson透露，中心旗下共有70位導師，當中僅6位入稟追討欠薪。他形容這6位導師為「負面貴人」，並指他們不給予中心轉型的機會。「我哋正想轉型時，呢6位導師就告我哋，佢唔俾機會我，佢話一係你賠錢，一係你唔好旨意做。」他又稱，其他兼職導師均表示願意延遲領薪，支持中心渡過難關，「我哋有個群組，好多人都好支持我哋，群組入面係得呢6位導師（追薪）。」
對於拖欠薪金及學員課程的問題，Dickson以「正當商人」自居，指中心過去23年一直以預繳模式經營，擁有良好口碑，「不過冇辦法，輸俾疫情。」不過他強調自己從沒想放棄或倒閉，「我哋唔想學生冇得玩，因為我哋收咗學生錢，我哋唔做好易㗎咋，唔做咪好似某大機構咁，唔做咪算囉，都冇人識佢，但有人識我呀嘛，我用我個名嚟做㗎嘛。」
以賣淫比喻處境 負責人：其實好偉大、但大家唔知
以賣淫比喻處境 負責人：其實好偉大、但大家唔知談及負債問題，Dickson以一個極具爭議的比喻解釋其處境：「一位媽咪如果要出去維生養家，冇得選擇嘅話，佢以肉體賣淫維生，一般人覺得佢冇人性、冇道德。但如果你一路睇，呢位媽咪好偉大，因為大家唔知，人人都睇表面。」
訪問中，Dickson再三強調，中心不會輕易結業，目前正積極尋找新場地重新開店，並已改變經營模式，由過往的月費「任做」計劃改為按課堂收費，學員可購買10堂、20堂或50堂的課程，無需預繳數年費用。他堅稱此舉並非預繳式消費，而是適應經濟環境的轉型。「瑜伽係咁，瑜伽係咩意思？係同呢個社會、呢個世界結合，點結合呀？就係佢點變，你點遷就佢。而家經濟好差，咁咪轉型、縮細佢囉。」
學員現身力撐：佢如果死咗就當「帛金」
學員現身力撐：佢如果死咗就當「帛金」訪問當日，數名學員及導師陪同Dickson現身，表達對其支持。其中一名學員表示，她於前年購買了價值約1.5萬元的31個月「任做」計劃，至今未曾上課，但對此並不介意，又指課程是永久有效，因此並不擔心。她認為分店結業是由於收費太便宜，「一個月任做都係$488喎，其實我一個月上5堂都回本。萬一佢真係執笠，我咪當之前『任做』畀多咗錢，假設阿Sir過咗身死咗，呢筆費用我咪當畀帛金佢囉。」
78 HOY資訊台：《一線搜查》
播出日期：逢周一至五
播出時間：晚上8時77台首播、10時半78台重播
WhatsApp報料熱線：68960931
節目重溫請＜按此＞
