一線搜查｜流浮山狗場掀爭議　義工控訴「三大罪」　場主反駁：佢哋唔係嚟幫手做嘢

颱風「樺加沙」今年9月底襲港，引發流浮山狗場撤離行動。惟義工事後向《一線搜查》指控，場內衛生惡劣，遍地糞便及尿液，鼠患嚴重，多隻狗患病無人理會；更質疑財政混亂，租約逾期兩年仍未遷址，拖欠租金水電費，卻持續以搬遷為由籌款。有義工斥責狗場負責人未有落心落力，完全放棄狀態。不過，場主Kelly則逐一反駁，更指有關義工是「一班搞事嘅人」，強調資源已轉向元朗新址，並稱自己健康惡化下仍獨力支撐百餘隻狗，「你話我咁樣都叫冇心機去繼續營運？我只係一個人，我唔係鐵人。」

颱風下救狗　義工入場驚見「老鼠派對」

「樺加沙」襲港期間，流浮山一間狗場面臨水浸風險，網上群組迅速動員約400至500名義工，成功將逾百隻狗隻轉移至安全地點或暫託家庭，不過有義工事後指控狗場三大罪。義工Gary（化名）指出，狗場地面留有不少糞便及尿液，內裡非常混亂，通道堆滿雜物，不少狗籠日久失修生鏽，亦有大量老鼠到處爬行。「我問啲資深義工，點解有咁嘅情況，佢哋話因為啲狗走晒，加上有狗糧擺喺度，打風又冇收起，老鼠就出嚟開派對。」

狗場鼠患問題嚴重，有義工在通訊群組中投訴，稱「污糟同臭都尚可以接受，我哋洗嗰間房成地青苔，狗屋入邊有蜘蛛，都唔緊要，但老鼠曱甴好恐怖，肥美得很，實在冇辦法再去第二次。」有義工甚至被老鼠抓傷，指當時自己正在清理垃圾，突然發現有大老鼠爬上身，「我應該係第一個俾老鼠抓親嘅人，抓傷咗之後我都唔知，係有水接觸到我傷口，我先覺得痛。」該名義工最終因傷口感染，需入院注射，發燒三日未退。

狗狗傷病冇人理　指甲倒插腳掌發炎

狗隻健康狀況亦令人憂慮，有義工發現狗場內不少狗隻帶傷或患病，其中「翠翠」指甲過長捲曲，倒插腳掌引致嚴重發炎。義工Andy（化名）：「部分係因為指甲太長引起，而負責人都冇發現，係由義工發現。你話喺一個狗場入面救返隻狗出嚟，呢件事你話荒唔荒謬先。」更有狗隻近心口處長瘤，場主雖然知情但未有主動就醫。Andy：「負責人知，但唔會特登帶佢去睇醫生，我哋要俾好多壓力佢，佢先話帶啲狗去睇醫生。」

義工阿花（化名）則指出，部分狗隻晶片資料與名稱不符，就連疫苗針卡亦已經過期，狗隻打風後去向記錄混亂，連場主與資深義工均無法準確掌握每隻狗的下落。另有義工直斥場主不負責任，「你咁樣做法都得㗎咩？咁唔負責任？隻狗男定女又唔知？針卡又冇、咩都冇，一時又話有打針，一時又話冇打針，隻狗叫咩名又唔知，仲要話俾咗隻狗我哋，當我哋喺街執返嚟。」有前義工直斥「無論一班義工幾努力幫手清潔，同埋幫啲狗出領養，最後場主都係可以搞到一塌糊塗。」

照顧狗場內逾百多隻狗，場主本身已經分身不暇，不過義工意外發現狗場內竟設有專屬貓房，專門飼養場主的寵物貓，惟環境同樣污穢。有義工就質疑：「個人已經有百幾隻狗，但你又要養寵物，我唔係話養寵物唔得，但我見到佢所謂嘅『寵物』都唔係好舒服嘅狀態，係好污糟嘅環境。」

多年未交財務報告　欠租2年業主10月底鎖門

涉事狗場持慈善牌照，依法須每年向公司註冊處提交經審計財務報告，惟狗場已經多年未有提交。《一線搜查》翻查最後公開的兩份財務報表，發現該三年以來部分支出，包括食物及租金等金額相當浮動。而直至今年5月，狗場的核數師更已經辭職。

一波未平，一波又起。在10月中，業主在狗場門口更張貼告示，指狗場租約已於2023年屆滿，但場主一直未有理會並拖延至今，同時拖欠租金、水電費多時，故決定於今年10月底上鎖。一眾義工眼見業主發出最後通牒，擔心場內百多隻狗隻隨時無家可歸。義工阿花（化名）透露，場主早於2023年已在社交平台發文聲稱「被逼遷」，需籌款或覓新址，惟兩年無進展。

《一線搜查》查閱城規會文件時發現，場主Kelly已提交元朗一幅用地申請用作狗場，不過未對外公布。有義工就質疑場主隱瞞新址申請，同時批評其財政狀況極不透明。義工Gary（化名）：「當我哋問佢啲錢點用，佢就會話我哋人手唔夠，所以我哋冇人去紀錄呢啲嘢。佢乜都話人手問題。」

Gary又透露，狗場的糧食及水「擺長糧」，「啲狗食就食，唔食就唔食。要真係有人入去先可以打理到入面，譬如收拾排泄物、加糧、加水」。義工Andy就批評場主沒有落心落力，「可能以前有心有力，後來可能有心冇力，直到而定係冇心冇力，完全放棄狀態。」

場主逐一反駁指控　斥「係一班搞事嘅人嚟」

面對義工的指控，負責人Kelly接受《一線搜查》訪問時，承認業主曾要求十月底前搬走，但已同意寬限至12月，而狗場新址目前亦在趕工。「因為新場地一直趕工裝修，所以初步傾希望12月左右成功搬到。而家新場地未準備好，狗狗搬過去都係住得唔安隱。」

對於被指場地污糟、澩嫪，Kelly解釋指明知即將遷出，不願浪費資源維修舊場，因此所有資金轉投新址，「（義工）就只係影我哋場地唔好嘅地方，好嘅地方佢哋又唔去影，又係網上不停攻擊。呢度就快搬，我亦唔想浪費資源，同埋我哋人手唔夠。新場地當然會做得比而家更好，呢個場幾年前係好靚，唔係而家咁，但日久失修需要錢去維修時候，我哋又知道冇辦法再做落去，我哋就唔再使錢喺舊場地，寧願留資源去新場地。」

至於財務報表未有公開，她指出，狗場的會計師、核數師都是由義工協助擔任，「啱啱嚟幾年，我哋連呢方面嘅義工都冇幫手做。我哋都趕緊工，我哋一路有同稅務局、公司註冊處聯繫。因為我哋遲交，當然都會罰我哋。」

曾兩度中風入院　場主：我只係一個人、唔係鐵人

Kelly又坦言近年健康轉差，曾兩度因中風入院，對於狗場自己已經盡咗最大努力。「我試過兩次中風入醫院，但點解我仲堅持落去，因為我覺得我救返嚟百幾條生命。我唔係冇嘗試同我哋義工傾，我話有冇人接手，我好擔心一旦我身體有事，班狗狗點算。但好現實咁睇，係冇人會接手。所以話我係冇心去經營咩？唔係，我只係一個人，我唔係鐵人。」

「你話有一班義工指控我，其實係一班搞事嘅人嚟。我擔心如果公開新場地，怕佢哋會去破壞新場地，令到我哋搬唔到。」Kelly說，除了每周六、日依賴約十名義工幫忙，平日僅靠自己照顧逾百隻狗。她批評部分義工只為到狗場拍照，未有實際作出幫助，「其實佢哋全部人入嚟影影影，影完又唔係幫手做嘢，冇幫手清理過糞便、冇幫手洗過一個地方、冇幫手派飯。大家喺度鬧，點解唔積極啲入嚟幫手做義工呢？積極幫手做義工，咪就係最佳改善狗仔生活質素囉。但冇㗎，啲人淨係上網鬧，投訴，講你點樣做得唔好。調返轉頭，換轉你哋任何一個人都做唔到。」

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞