亞冠精英聯賽　泰港7比4反勝FC北京

【有線新聞】亞冠精英聯賽，泰港主場7比4反勝下半場大部份時間十人應戰的FC北京。

上半場就有7個入球，5分鐘第一個，泰港門將科基斯加特拍出來、送的，阿高路多謝了，拗腰射入。16分鐘泰港的順素貝爾射遠柱入網1比1，腳得頭又得，又是順素貝爾，泰港19分鐘反超前。4分鐘後北京的達雲回敬頭槌2比2。有3位球員入兩球，入多過他們就只有窩利抽入的隊長巴甸，29分鐘泰港再領先。8分鐘後北京又追和，志村謄出腳一攔，「擺烏龍」角度刁鑽，無辦法了。達雲射近柱，41分鐘攻入個人今場第2球，輪到北京搶回領先位置完半場。

換邊後一面紅牌改變形勢，經VAR協助，球證由黃牌升級成紅牌，58分鐘趕北京的古爾拉莫斯出場。北京各項賽事21場不敗走勢告一段落，泰港隊長巴甸表演世界波時間，78分鐘禁區頂拉去死角4比4。未夠未夠，精彩入球不會嫌多，巴甸放去遠柱網仔完成帽子戲法，3分鐘後泰港領先5比4。還有補時的入球主角，提拉錫單刀夠淡定，扣一扣再射入，拉開兩球優勢。港隊茹子楠後備入替，盡力補位，飛身亦無法阻止提拉錫入多球，之前3輪都落敗的泰港今屆首次贏出就大勝7比4。