一線搜查｜前員工揭鼠患成災　番薯生蟲、爛水果照用　連鎖飲品店：離職後挾怨報復

有線新聞
2026年06月18日

內地連鎖飲品店近年強勢殺入香港市場，但其中一間主打番薯的品牌就有前員工指證前公司存在嚴重食物安全及衛生問題，近20間多間分店普遍存在鼠患、食材處理不當及衛生環境惡劣等情況，令人質疑顧客食安保障。

「我覺得我行得正企得正，我必須要行出嚟話畀大家聽。」前員工Joey（化名）向《一線搜查》表示，自己曾於該品牌多間分店擔任兼職及全職工作，曾發現有番薯出現蛆蟲，甚至是被老鼠咬過的，「我哋都有即刻上報，當其時得到嘅回應就係睇下佢咬得深唔深，冇味就切咗佢、洗吓佢，然後擺落焗爐」。

Joey發現原來有好多分店都有嚴重嘅鼠患問題，「個衛生環境係極度惡劣，打開啲櫃、Storage嘅所有地方全部都係老鼠屎，鋪頭都係老鼠尿嘅味道。會存放啲膠袋、杯蓋，甚至乎存放食物，譬如雞蛋嗰個盒呀，都係老鼠嘅蹤跡。會跌啲老鼠屎落嚟，咁所以呢，有員工呢就將佢封咗……呢啲黑色呢全部都係老鼠屎，咁你諗下有幾咁誇張？」

Joey自言「睇唔過眼」都曾經嘗試幫手去滅鼠，就開始向上司尋求方法，「會唔會係搵人嚟滅鼠？定係買老鼠藥？定係買老鼠膠？大家好似都無動於衷咁樣，只係覺得開門做生意，有錢賺就OK咁，所以我自己都有自發性去買啲老鼠板、買啲老鼠藥，甚至乎大清潔間舖頭，當你清完一輪之後，第二個人接手，一樣如是，都係咁樣。」

「烤腸仔成本好貴呀？睇住佢跌落地，執返，攞水沖沖再燒。」另根據網上部分消費者的貼文亦指出不少衛生問題，包括跌落地面的食物撿起清洗後繼續使用、急凍手抓餅完全溶化後雪返再賣，網上「集運」購買的水果腐爛出水後切走爛的部分繼續售賣等。Joey亦指部分分店的雞扒更由朝早9時放到下午5時，置於無保溫設備的外露盒內，「我都真係唔識點樣去形容，甚至乎飲嘅水，即係我哋自己會飲嘅水，我自己都唔夠膽飲。」

據了解，不時都有食客投訴食品質素問題，包括腸仔疑有異物、番薯中間腐壞、珍珠變酸、小料變壞，甚至有蟲等。Joey指面對投訴一般以退款或補貨處理，她自己亦曾因懷疑食材安全而勸阻孕婦購買雞扒產品。

除了食安問題，Joey更發現店舖經常聘請一些「老師」在後廚工作，只要涉及到前台或者收銀位置，甚至乎出杯位置，一律都會拒絕。Joey在偶然間於其中一位「老師」口中得知，「原來佢哋係攞旅遊簽證嚟工作嘅，咁所以我就恍然大悟，原來成日換老師或者成日換人，係因為佢哋每七天就要出一次境。」

她曾就此聯絡入境處，但處理進度令她失望，「都有問過如果我現在當場係度報警，咁警察可唔可以處理呀？咁佢就話你可以試下去報警嘅，咁至於警察嗰邊會唔會Refer過嚟，就係警察嗰part嘅事。」至於食環會否介入，Joey則稱：「除咗轉牌嘅時候有見過食環署之外呢，係從來冇見過食環署出差過嘅。」

Joey曾在網上公開相關問題，結果遭公司代表要求刪帖，「你（Joey）要我花多少錢，也可以，你一定逃不掉」，並發出律師聲明指其內容為蓄意抹黑、斷章取義，強調「所謂老鼠咬食同隔夜食材」都是每日定點銷毀的物料，絕不使用；又指Joey因「對顧客失禮，嚴重違反規程及衞生標準」不予錄用，「離職後挾怨報復」。公司其後再發文指事件為各門店管理者敲響警鐘，承諾加強食物安全及衛生管理，並上載多間分店大清潔後的照片。《一線搜查》曾聯絡該公司，截稿前未獲回覆。

食環署發言人回覆《一線搜查》指由去年至今年5月15日期間，共接獲50宗關於該連鎖飲品店及其處所的投訴，涉及食物安全、環境衛生及無牌經營食物業等。當局已就相關違規提出9宗檢控，包括8宗無牌經營食物業及1宗器具不潔。入境處則表示一直密切關注非法勞工活動，會適時採取執法行動。