一線搜查｜酒樓「無縫接替」輸入外勞　六旬本地工突遭解僱：個心喺度震　工會揭僱主「三部曲」炒人成風

本港失業率持續上升，部分僱主為節省開支，頻頻輸入外勞取代本地員工，引發勞工權益爭議。《一線搜查》接獲一名六旬酒樓員工投訴，指自己被辭退當日，酒樓即聘請外勞「無縫接班」。雖然涉事酒樓否認以外勞取代本地工，但工會批評此類事件日益嚴重，不少工友不滿政府的懲罰「無阻嚇力」，更揭露僱主炒人前有「三部曲」，包括減工時、安排替假、訓練外勞後即棄用本地工。

酒樓六旬員工突遭解僱　外勞「無縫接替」

「呢份工我返咗幾十年，呢個酒樓係一手接一手。」在觀塘一家酒樓工作多年的施女士接受《一線搜查》訪問時表示，酒樓於2023年9月易手，新老闆接管後，她負責早更工作，獨力支撐整個樓面。「有時連廁所都冇得去，（早上）6點開波，有時等到8點先有人接手，得我一個，有時要兩邊跑。個場好大吓㗎，有A區、有B區。」施女士坦言，早更工作繁重，人手不足，但她從未抱怨，直到8月初，情況急轉直下。

酒樓在8月初未與施女士商量下，突然安排她放年假。「無端端，我8月1號仲返緊工，2號夜晚10點編個更表出嚟叫我放年假，編咗連續六日，到8號先返工。」施女士起初以為是正常輪休，「我就諗，都已經編咗，算啦，我冇講啦，就休息啦。」怎料，8月6日下午，她突然接到店長「權哥」電話指「夠人了，以後不用回來了。」

「佢咁講，（聽完）好似個心喺度震。」施女士坦言無法接受，「估都估唔到，突然間叫我唔使返工，真係接受唔到。」巧合的是，她收到解僱通知當日，酒樓即聘請外勞上班，形成「無縫交接」。據同事透露，外勞於同日中午12時已到場，包括兩名樓面外勞及洗碗工人。施女士還提到，店長早在6、7月已放風：「醒醒定定啊，外勞就快嚟㗎啦」、「新請咗外勞，嚟緊㗎啦」。她強調，「酒樓人手已經夠人，所以外勞嚟咗，就即刻炒咗我哋兩個。」施女士已就事件向勞工處投訴，獲回覆指調查需時，但承認「時間很吻合」。

《一線搜查》攝製隊親身到酒樓視察，不同時段觀察到多名疑似非本地員工在場工作，包括樓面侍應及後場洗碗位，粗略估計至少5至6人非本地人。採訪期間，恰巧有入境處人員到場巡查，向員工查驗身份證，記錄職位及資料。多名疑似外勞的員工則被帶至旁邊一張枱填寫問卷調查。

否認外勞取代本地工　酒樓會計：我哋無可奈何先用外勞啫

入境處人員離開後，攝製隊向店長求證，對方一度拒絕拍攝及回應，最終由酒樓會計羅小姐出面解釋。羅小姐強調，酒樓絕無因輸入外勞而炒本地工，「其實我哋飲食業𠵱家都好慘，因為青黃不接。話我哋有外勞就炒本地勞工，其實有冇咁嘅事？我唔夠膽否認有冇，但我哋公司絕對冇可能嘅。我哋𠵱家啲員工好多都超過70歲，我哋都冇解僱，我哋用到都盡量用。」

羅小姐指，施女士的解僱「有理有據」，涉及不服從上司及遭茶客投訴，並強調酒樓的本地工與外勞比例「絕對冇問題」，聘請外勞並非取代，而是補充。「因為佢係返朝早6點，𠵱家我請兩個侍應生最早都係返8點，有時係返夜晚。唔係嚟填佢個位，搞清楚呀吓！」

她解釋，聘請外勞是因本地招聘困難，「呢個問題，我估你去訪問十間，有八間都會同你講請唔到潔淨、洗碗。我哋始終係酒樓，要求勞動力，譬如拉檔、或者搬杯碗等，所以先請兩位男士。」至於薪酬方面，羅小姐透露外勞月薪約1.4萬元，樓面不超1.5萬元，洗碗則1.6萬元，「其實佢哋嘅人工唔係偏低，咁我點解一定要外勞呢？只不過係有啲位，係我哋真係無可奈何先會用外勞啫。」

輸入外勞計劃衝擊飲食業，港九勞工社團聯會副主席譚金蓮指出，由2023年9月至今年年中，輸入外勞計劃已經批出接近9萬個工作名額，形容情況是前所未有，對本身勞動市場造成一定衝擊。其中，飲食業佔近3萬個，絕大部分為廚房或侍應職位。

揭僱主炒人「三部曲」　譚金蓮：情況越嚟越嚴重

工會更揭露僱主炒人「三部曲」，第一是減工時或調分店；第二，安排替假及訓練外勞；第三，外勞上手後即解僱。譚金蓮指出，工友反映公司在去年12月通知將聘請外勞，要求減工時及調分店。「目的係咩？就係替假同協助訓練外勞。其實做法都差唔多，先減工時，第二係當你替假。到外勞上手之後，第三部曲，拜拜啦，用完即棄。」她坦言，「呢種情況係越嚟越嚴重。」

另外，早前尖沙咀有中菜廳因聘用外勞後解僱本地工，被勞工處實施行政制裁，未來兩年不得申請聘外勞。勞工及福利局局長孫玉菡稱懲罰具阻嚇力，但譚金蓮直言工友認為懲罰不足，「大家都係一片鬧聲，話『搞錯啊，就係咁樣罰法咋？即係冇阻嚇力，罰有咩用啊？』。」她說，希望將工友的聲音反映予政府，「工友唔係想罰企業，工友係想返工！返工有份固定收入可以攞返屋企，靠自己勞動工去維持屋企收入。如果唔係去打工嘅話，你政府養佢咩？」

勞工處：嚴肅跟進投訴個案　如有足夠證據將作行政制裁

而就有關個案，入境處回覆《一線搜查》，指於9月3日在全港各區展開執法行動，打擊輸入外勞違規行為。行動中拘捕6名涉嫌違反逗留條件的輸入勞工，包括兩男四女，年齡介乎25至58歲，涉嫌在非合約指定地點或職位工作；另拘捕一男一女負責人，涉嫌協助及教唆違規。同日，入境處曾巡查觀塘涉事酒樓，惟無人被捕。

勞工處則重申，「補充勞工優化計劃」規定僱主不得以輸入勞工取代原來在職的本地僱員，如需裁員，僱主應先裁減輸入勞工。處方會嚴肅跟進所有投訴個案，包括到輸入勞工的工作地點進行巡查、獨立會見僱主及僱員，並查核有關的僱傭紀錄。如有足夠證據，會作出行政制裁。至於就有關涉事個案，勞工處就指基於保密原則，不會透露個別僱主聘用勞工的情況及個別投訴個案的資料。

78 HOY資訊台：《一線搜查》
播出日期：逢周一至五
播出時間：晚上8時77台首播、8時半78台重播
WhatsApp報料熱線：68960931
節目重溫請＜按此＞